یوکرین کے صدر ولودومیر زیلنسکی نے دعویٰ کیا ہے کہ روس مشرق وسطیٰ میں جاری کشیدگی کو اپنے مفاد میں استعمال کرنا چاہتا ہے تاکہ امریکا کی توجہ یوکرین سے ہٹ جائے اور کیف کو ملنے والی امریکی معاونت محدود ہو جائے۔ انہوں نے یہ دعویٰ بھی کیا کہ جنگ کے آغاز سے اب تک روس کے 15 لاکھ سے زائد فوجی ہلاک ہو چکے ہیں۔

امریکی ذرائع ابلاغ کو دیے گئے ایک انٹرویو میں ولودومیر زیلنسکی نے الزام عائد کیا کہ ماسکو نے ایران کو ایسے ڈرون فراہم کیے جو بعد ازاں مشرق وسطیٰ میں اسرائیل کے خلاف استعمال کیے گئے۔ ان کے مطابق یوکرین کو حاصل ہونے والی انٹیلی جنس معلومات سے ظاہر ہوتا ہے کہ روس اس بات سے مطمئن ہے کہ مشرق وسطیٰ میں تنازع مکمل طور پر ختم نہیں ہو رہا۔

زیلنسکی کا کہنا تھا کہ روس سمجھتا ہے کہ اگر امریکا مشرق وسطیٰ کی صورتحال میں مصروف رہا تو وہ یوکرین کو پہلے کی طرح سیاسی، عسکری اور مالی معاونت فراہم نہیں کر سکے گا، جس سے روس کو جنگی محاذ پر فائدہ پہنچ سکتا ہے۔

جنگ میں کامیابی یا ناکامی سے متعلق سوال کے جواب میں یوکرینی صدر نے کہا کہ ان کے نزدیک فتح کا مطلب اپنے ملک اور آزادی کا تحفظ ہے۔ ان کے بقول جب تک یوکرین اپنی خودمختاری برقرار رکھے ہوئے ہے، اسے شکست نہیں کہا جا سکتا، جبکہ روس بھی اپنے مقاصد حاصل کرنے میں کامیاب نہیں ہوا۔

انہوں نے مزید دعویٰ کیا کہ فروری 2022 سے جاری جنگ میں روس کے 15 لاکھ سے زیادہ فوجی مارے جا چکے ہیں۔ تاہم انہوں نے یوکرین کے مجموعی جانی نقصانات کی مکمل تفصیلات دینے سے گریز کیا۔ ان کے مطابق اب تک تقریباً 50 ہزار یوکرینی فوجی ہلاک، چار لاکھ کے قریب زخمی جبکہ متعدد اہلکار لاپتا ہیں۔

واضح رہے کہ روس اور یوکرین کے درمیان جنگ 24 فروری 2022 کو روسی حملے کے بعد شروع ہوئی تھی۔ اس کے بعد سے دونوں ممالک کے درمیان شدید لڑائی، فضائی حملے اور زمینی جھڑپیں جاری ہیں، جن کے نتیجے میں ہزاروں افراد جان کی بازی ہار چکے ہیں جبکہ لاکھوں شہری بے گھر ہوئے ہیں۔ دونوں فریق ایک دوسرے کے جانی نقصانات سے متعلق متضاد دعوے کرتے رہے ہیں جن کی آزاد ذرائع سے مکمل تصدیق ممکن نہیں ہو سکی۔