ہنوئی: ویتنام میں مقیم بھارتی یوگا ٹیچر نے اپنی غیرمعمولی جسمانی صلاحیتوں کا مظاہرہ کرتے ہوئے صرف ایک سانس میں پانی کے اندر 86 پش اپس لگا کر نیا گنیز ورلڈ ریکارڈ قائم کر دیا۔

غیر ملکی میڈیا رپورٹس کے مطابق 38 سالہ کمل کلوئی نے بتایا کہ اس کامیابی کے پیچھے طویل عرصے کی سخت مشق، کیلستھینکس کی تربیت اور سانس روکنے کی خصوصی مشقوں کا اہم کردار ہے۔ انہوں نے اکتوبر 2025 میں ویتنام کے ایک سوئمنگ پول میں یہ منفرد کارنامہ انجام دیا۔

کمل کلوئی اس سے قبل بھی عالمی سطح پر اپنی صلاحیتوں کا لوہا منوا چکے ہیں۔ انہوں نے 2020 میں پانی کے اندر مسلسل 21 یوگا آسن انجام دے کر بھی گنیز ورلڈ ریکارڈ اپنے نام کیا تھا، جس کے بعد وہ ایک بار پھر ایک منفرد ریکارڈ قائم کرنے میں کامیاب ہوئے ہیں۔

گنیز ورلڈ ریکارڈز سے گفتگو کرتے ہوئے کمل کلوئی نے کہا کہ انہیں بچپن سے ہی منفرد اور غیرمعمولی کام کرنے کا شوق تھا۔ ان کے مطابق جب بھی وہ کسی کو عالمی ریکارڈ قائم کرتے یا کوئی بڑی کامیابی حاصل کرتے دیکھتے تو انہیں بھی ایسا ہی کارنامہ انجام دینے کا جذبہ ملتا تھا۔

انہوں نے مزید بتایا کہ اس ریکارڈ کے لیے جسمانی طاقت کے ساتھ ذہنی یکسوئی، برداشت اور سانس پر مکمل کنٹرول بے حد ضروری تھا، جس کے لیے انہوں نے طویل عرصے تک مسلسل تربیت حاصل کی۔

گنیز ورلڈ ریکارڈز نے کمل کلوئی کی جانب سے پیش کیے گئے شواہد کا تفصیلی جائزہ لینے کے بعد ایک ہی سانس میں پانی کے اندر 86 پش اپس مکمل کرنے کے عالمی ریکارڈ کی باضابطہ تصدیق کر دی۔