اسلام آباد: معرکہ حق میں پاکستان کی فتح کی علامت ’یادگار فتح‘ کی عوامی تقریب رونمائی اسلام آباد میں منعقد ہوئی، جس میں مختلف شعبہ ہائے زندگی سے تعلق رکھنے والے افراد اور عوام نے شرکت کی۔

اے پی پی کے مطابق وزارت اطلاعات و نشریات اور کیپٹل ڈیولپمنٹ اتھارٹی کے اشتراک سے منعقدہ تقریب میں یادگار کو عوام کے لیے کھولنے کا اعلان کیا گیا۔ تقریب کے دوران موسیقی کے پروگرام اور پروجیکشن میپنگ شو کے ذریعے معرکہ حق میں فتح کو اجاگر کیا گیا۔

وفاقی سیکریٹری اطلاعات و نشریات اشفاق احمد خلیل نے کہا کہ ’یادگار فتح‘ قوم کی فتح کی علامت ہے، جس کی بنیاد جرات، بہادری اور غیر متزلزل عزم پر رکھی گئی ہے۔ انہوں نے یادگار کی افتتاحی تقریب کو قوم اور آنے والی نسلوں کے لیے باعث فخر لمحہ قرار دیا۔

تقریب میں پروجیکشن میپنگ ٹیکنالوجی کے ذریعے یادگار کی تعمیر کی کہانی بھی پیش کی گئی، جس میں اس کی تعمیر کے آغاز سے تکمیل تک کے مراحل اور اس منصوبے میں شامل ٹیم کی خدمات کو اجاگر کیا گیا۔

تقریب کے دوران بتایا گیا کہ یادگار میں پانچ محرابیں تعمیر کی گئی ہیں جو اسلام کے پانچ ارکان کی علامت ہیں، جبکہ یہ پاکستان کے پانچ ستونوں، حکومت، عسکری قوت، میڈیا، عوام اور قومی نظریے کی بھی نمائندگی کرتی ہیں۔

یادگار کے ڈیزائن میں پاکستان کی مسلح افواج کی تینوں سروسز، بری فوج، پاک فضائیہ اور پاک بحریہ کے علاوہ سائبر دفاع اور خلائی جنگ کی عکاسی بھی کی گئی ہے۔

یادگار میں جدید پروجیکشن میپنگ کا نظام نصب کیا گیا ہے، جس کے ذریعے روشنی، موسیقی اور فن تعمیر کو یکجا کرکے مختلف پروگرام پیش کیے جائیں گے۔

تقریب میں سماجی و سیاسی شخصیات، کھلاڑیوں، طلبہ اور مختلف شعبوں سے تعلق رکھنے والے افراد نے شرکت کی۔ پاکستان شطرنج فیڈریشن کے سربراہ ذیشان نقوی نے بھی شطرنج کے گولڈ میڈل حاصل کرنے والے کھلاڑیوں کے ہمراہ تقریب میں شرکت کی۔

قومی کرکٹر رضا اللہ نے مسلح افواج کی قربانیوں کو خراج تحسین پیش کیا، جبکہ چاچا کرکٹ نے بھی معرکہ حق میں فتح پر قوم کو مبارک باد دی۔

عوام کو بتایا گیا ہے کہ یادگار فتح اتوار سے پیر کے علاوہ تمام دنوں میں شام 5 بجے سے رات 10 بجے تک کھلی رہے گی۔ یادگار کی سیر کے لیے مفت ٹکٹ ویب سائٹ کے ذریعے حاصل کیے جا سکتے ہیں۔