ویب ڈیسک:میسجنگ ایپلی کیشن واٹس ایپ نے آئی فون صارفین کے لیے والدین کے کنٹرول سے متعلق نیا سیکشن متعارف کرانا شروع کردیا ہے، جس کے ذریعے والدین بچوں کے اکاؤنٹس کی نگرانی اور مختلف پابندیاں عائد کرسکیں گے۔

واٹس ایپ کے پیرنٹ مینیجڈ اکاؤنٹس کے تحت والدین یا سرپرست یہ طے کرسکیں گے کہ بچے سے کون رابطہ کرسکتا ہے اور وہ کن گروپس میں شامل ہوسکتا ہے۔ اس کے علاوہ چینلز اور اسٹیٹس سمیت بعض فیچرز تک رسائی بھی محدود کی جاسکے گی۔

نئے نظام کے ذریعے والدین کو بچے کے اکاؤنٹ سے متعلق بعض سرگرمیوں کی معلومات بھی دستیاب ہوں گی، جن میں نئے رابطے، بلاک کیے گئے صارفین اور پروفائل میں کی جانے والی تبدیلیاں شامل ہیں۔

یہ سہولت پہلے اینڈرائیڈ صارفین کے لیے الگ پیرنٹل کنٹرولز سیکشن کے ذریعے دستیاب تھی، تاہم اب یہی نظام آئی فون اور دیگر آئی او ایس صارفین کے لیے بھی متعارف کرایا جارہا ہے۔

واٹس ایپ کے مطابق یہ سہولت ان صارفین کے لیے ہے جو اپنے ملک یا خطے میں ایپ استعمال کرنے کی مقررہ کم از کم عمر سے کم ہوں۔ بعض صورتوں میں ایپل بچے کی عمر سے متعلق معلومات براہ راست واٹس ایپ کے ساتھ شیئر کرسکتا ہے۔

واٹس ایپ کا کہنا ہے کہ اس اقدام کا مقصد کم عمر صارفین کے لیے پلیٹ فارم کو زیادہ محفوظ بنانا اور والدین کو بچوں کی آن لائن سرگرمیوں کی نگرانی کے لیے مزید مؤثر ذرائع فراہم کرنا ہے۔