واشنگٹن ڈی سی: امریکی وزیر خزانہ سکاٹ بیسنٹ نے اعلان کیا ہے کہ قطر کے دارالحکومت دوحہ میں ایک خصوصی آپریشنل سیل قائم کیا جائے گا جو ایران کے غیر منجمد فنڈز کے استعمال اور ان کی نگرانی کا ذمہ دار ہوگا۔

الجزیرہ کے مطابق سکاٹ بیسنٹ نے کہا کہ امریکی محکمہ خزانہ اس ادارے کے ذریعے اس بات کو یقینی بنائے گا کہ ایران کو دستیاب کرائے جانے والے فنڈز طے شدہ مقاصد کے لیے ہی استعمال ہوں۔

امریکی ٹی وی چینل سی این بی سی کو دیے گئے انٹرویو میں انہوں نے صدر ڈونلڈ ٹرمپ کے مؤقف کی تائید کرتے ہوئے کہا کہ ایران کے غیر منجمد اثاثوں کا بڑا حصہ خوراک اور ادویات کی خریداری پر خرچ کیا جائے گا، جبکہ ان خریداریوں میں امریکی مصنوعات کو ترجیح دی جائے گی۔

انہوں نے کہا کہ ایران کو فراہم کیے جانے والے فنڈز کا اولین مقصد ایرانی عوام کی فلاح و بہبود ہونا چاہیے۔ ان کے مطابق یہ رقوم ممکنہ طور پر قطر کے ذریعے جاری کی جائیں گی، جبکہ امریکی محکمہ خزانہ ان کی تقسیم اور استعمال پر براہ راست نظر رکھے گا۔

سکاٹ بیسنٹ کا کہنا تھا کہ فنڈز کا ایک بڑا حصہ امریکی خوراک اور ادویات کی خریداری کے لیے مختص ہوگا، جس سے یہ رقم امریکی مصنوعات کی خریداری کے ذریعے دوبارہ امریکی معیشت میں واپس آئے گی۔