امریکا نے دبئی میں قائم کرپٹو کرنسی ایکسچینج شیلبٹ اور اس کے ایرانی بانی سیاوش کیوان پور سمیت متعدد متعلقہ اداروں پر پابندیاں عائد کردی ہیں۔

میڈیا رپورٹس کے مطابق امریکی حکام نے الزام عائد کیا ہے کہ شیلبٹ نے ایران کے انقلابی گارڈ، ایرانی مرکزی بینک اور دیگر ایران سے منسلک اداروں کے لیے لاکھوں ڈالر کی کرپٹو لین دین میں سہولت فراہم کی۔ امریکی حکام کے مطابق ایکسچینج نے ان اداروں کو امریکی پابندیوں سے بچنے میں بھی مدد فراہم کی۔

رائٹرز کی ایک تحقیق کے مطابق شیلبٹ ایسے وسیع مالیاتی نیٹ ورک کا حصہ رہا ہے جس کے ذریعے اربوں ڈالر مالیت کی کرپٹو کرنسی کی لین دین کی گئی۔ امریکی حکام کی جانب سے کی جانے والی تازہ کارروائی کا بنیادی مقصد ایران سے متعلق مبینہ غیر قانونی مالیاتی نیٹ ورک کو محدود کرنا اور اس کے مالی ذرائع کو روکنا ہے۔

شیلبٹ دبئی میں رجسٹرڈ ایک کرپٹو کرنسی ایکسچینج ہے، جبکہ امریکا نے اس کے بانی سیاوش کیوان پور کو بھی پابندیوں کی فہرست میں شامل کرلیا ہے۔

امریکی کرپٹو ریگولیٹر کی جانب سے بھی شیلبٹ کے حوالے سے اینٹی منی لانڈرنگ اور دہشت گردی کی مالی معاونت سے متعلق قوانین کی مبینہ خلاف ورزیوں کی نشاندہی کی گئی ہے۔

دوسری جانب شیلبٹ نے اپنے خلاف عائد الزامات کو مسترد کرتے ہوئے کسی بھی غیر قانونی سرگرمی یا منی لانڈرنگ میں ملوث ہونے سے انکار کیا ہے۔ ایکسچینج کا کہنا ہے کہ اس کی تمام سرگرمیاں جنوری 2026 میں بند ہوچکی تھیں۔

امریکی پابندیوں کے نتیجے میں شیلبٹ، اس کے بانی اور متعلقہ اداروں کے اثاثوں اور مالی سرگرمیوں پر مزید پابندیاں عائد ہونے کا امکان ہے، جبکہ واشنگٹن کی جانب سے ایران سے منسلک مالیاتی نیٹ ورکس کے خلاف کارروائیوں کا سلسلہ بھی جاری ہے۔