ویب ڈیسک: امریکا نے مشرق وسطیٰ میں اپنی فوجی موجودگی اور تنصیبات کی تعداد کم کرنے کے امکانات کا جائزہ لینا شروع کردیا ہے۔

امریکی نشریاتی ادارے کے مطابق امریکی فوج اور انٹیلی جنس اداروں کے حکام خطے میں تعینات اہلکاروں اور فوجی تنصیبات میں کمی کے مختلف امکانات پر غور کر رہے ہیں۔ ذرائع کے مطابق اگر ٹرمپ انتظامیہ ایران کے ساتھ جاری تنازع ختم کرنے میں کامیاب ہوجاتی ہے تو مشرق وسطیٰ میں امریکی موجودگی نمایاں طور پر کم کیے جانے کا امکان ہے۔

رپورٹ کے مطابق نائن الیون حملوں کے بعد امریکا نے عراق، افغانستان، شام، ایران، یمن اور لیبیا میں کارروائیوں کے لیے مشرق وسطیٰ میں اپنے فوجی اور انٹیلی جنس نیٹ ورک کو وسیع کیا تھا۔ تاہم ایران کے ساتھ حالیہ تنازع نے خطے میں موجود امریکی فوجی ڈھانچے کی خامیوں اور کمزوریوں کو نمایاں کردیا ہے۔

ذرائع کے مطابق اس وقت مشرق وسطیٰ میں تقریباً 50 ہزار امریکی فوجی تعینات ہیں، جبکہ دو طیارہ بردار بحری جہاز اور ایک درجن سے زائد دیگر جنگی بحری جہاز بھی خطے میں موجود ہیں۔ واپس بلائے گئے امریکی خفیہ ادارے کے اہلکاروں کو بھی دوبارہ مشرق وسطیٰ بھیجا جارہا ہے۔

امریکی فوج خطے میں موجود باقی ماندہ دستوں کے دفاع کو مزید مضبوط بنانے کے امکانات کا بھی جائزہ لے رہی ہے۔ ذرائع کے مطابق امریکی محکمہ دفاع طویل عرصے سے فوجی اڈوں کو زیر زمین منتقل کرنے پر غور کرتا رہا ہے، تاہم ایرانی حملوں کے بعد اس منصوبے پر فوری پیش رفت کی ضرورت مزید بڑھ گئی ہے۔

فوجی حکام نے آئندہ سال تک مشرق وسطیٰ میں امریکی فورسز کے ڈھانچے میں ممکنہ تبدیلی کے لیے مختلف لائحہ عمل بھی تیار کرلیے ہیں۔