تہران:ایران کے جوہری توانائی کے ادارے نے دعویٰ کیا ہے کہ امریکی افواج نے ملک کے جنوب مغربی علاقے میں واقع زیرِ تعمیر دارخوین نیوکلیئر پاور پلانٹ پر حملہ کیا ہے۔

غیر ملکی میڈیا رپورٹس کے مطابق ایرانی سرکاری ٹیلی ویژن پر نشر کیے گئے بیان میں جوہری توانائی کے ادارے نے کہا کہ امریکی فوج نے اتوار کے روز متعدد راکٹوں اور میزائلوں کے ذریعے دارخوین میں قائم زیرِ تعمیر جوہری تنصیب کو نشانہ بنایا۔

ادارے کے مطابق حملہ براہِ راست نیوکلیئر پاور پلانٹ پر کیا گیا، تاہم فوری طور پر جانی یا مالی نقصان کی تفصیلات جاری نہیں کی گئیں۔

ایرانی جوہری توانائی کے ادارے نے امریکی کارروائی کی شدید مذمت کرتے ہوئے اسے "وحشیانہ" قرار دیا۔ بیان میں کہا گیا کہ ایک جوہری تنصیب کو نشانہ بنانا بین الاقوامی قوانین اور ضابطوں کی سنگین خلاف ورزی ہے اور ایسی کارروائیاں خطے کے امن و استحکام کے لیے خطرناک ثابت ہو سکتی ہیں۔

ادارے نے عالمی برادری اور متعلقہ بین الاقوامی اداروں سے مطالبہ کیا کہ وہ اس حملے کا نوٹس لیں اور جوہری تنصیبات کے تحفظ کو یقینی بنانے کے لیے مؤثر اقدامات کریں۔

دوسری جانب حملے سے چند گھنٹے قبل امریکی صدر ڈونلڈ ٹرمپ نے نیوز نیشن کو دیے گئے انٹرویو میں کہا تھا کہ جاری جنگ کا بنیادی مقصد ایران کو کسی بھی صورت جوہری ہتھیار حاصل کرنے سے روکنا ہے۔ انہوں نے اردن میں امریکی فوجیوں کی ہلاکت پر افسوس کا اظہار کرتے ہوئے کہا کہ امریکا اپنی قومی سلامتی اور اتحادیوں کے دفاع کے لیے ضروری اقدامات جاری رکھے گا۔