ماسکو: روس کے سرحدی علاقے بریانسک ریجن میں یوکرینی افواج کے مبینہ راکٹ حملے میں ایک 15 سالہ لڑکی اور اس کی دادی جاں بحق جبکہ ایک خاتون زخمی ہو گئی۔

غیر ملکی میڈیا رپورٹس کے مطابق حملہ بریانسک ریجن کے ضلع سوزیمکا کے مرکزی گاؤں سوزیمکا پر کیا گیا، جہاں گریڈ ملٹی پل راکٹ لانچر استعمال کیے جانے کا دعویٰ کیا گیا ہے۔

بریانسک ریجن کے قائم مقام گورنر ییگور کووالچک نے ٹیلی گرام پر جاری بیان میں کہا کہ حملے کے نتیجے میں 15 سالہ بچی اور اس کی دادی جان کی بازی ہار گئیں، جبکہ ایک خاتون زخمی ہوئیں جنہیں فوری طور پر ہسپتال منتقل کر دیا گیا، جہاں ان کا علاج جاری ہے۔

روسی حکام کے مطابق حملے میں ایک رہائشی مکان مکمل طور پر تباہ ہو گیا، جبکہ چار دیگر گھروں کو نقصان پہنچا۔ اس کے علاوہ متعدد ذیلی عمارتیں، ایک کار اور ایک ٹریکٹر بھی حملے کی زد میں آئے۔

واقعے کے بعد بریانسک ریجن کے پراسیکیوٹر ولادیمیر موسن نے مقامی حکام کو متاثرہ خاندانوں کی ہر ممکن مدد فراہم کرنے کی ہدایت جاری کی۔ انہوں نے متعلقہ اداروں کو صورتحال پر مسلسل نظر رکھنے اور امدادی سرگرمیوں کو تیز کرنے کا بھی حکم دیا۔

پراسیکیوٹر کے دفتر نے متاثرہ شہریوں کی شکایات اور درخواستیں وصول کرنے کے لیے ایک ہاٹ لائن بھی قائم کر دی ہے تاکہ قانونی اور انتظامی معاونت بروقت فراہم کی جا سکے۔

یہ واقعہ روس اور یوکرین کے درمیان جاری جنگ کے تناظر میں پیش آیا، جہاں سرحدی علاقوں میں حملوں اور جوابی کارروائیوں کا سلسلہ بدستور جاری ہے۔