لندن:برطانوی وزیراعظم Keir Starmer نے امریکا اور ایران کے درمیان طے پانے والے امن معاہدے کا خیرمقدم کرتے ہوئے اسے مشرق وسطیٰ میں کشیدگی کم کرنے اور استحکام کو فروغ دینے کی جانب اہم پیش رفت قرار دیا ہے۔

غیر ملکی میڈیا رپورٹس کے مطابق اپنے بیان میں کئیر اسٹارمر نے کہا کہ وہ اس معاہدے کا بھرپور خیرمقدم کرتے ہیں، جس کے تحت فریقین نے تنازعات کے حل کے لیے سفارت کاری کو ترجیح دینے اور مختلف محاذوں پر عسکری کارروائیوں کو روکنے پر اتفاق کیا ہے۔

برطانوی وزیراعظم نے کہا کہ خطے میں امن اور استحکام نہ صرف مشرق وسطیٰ بلکہ عالمی برادری کے مفاد میں ہے۔ انہوں نے آبنائے ہرمز کو دوبارہ کھولنے کے فیصلے کو عالمی تجارت اور توانائی کی ترسیل کے لیے انتہائی اہم قرار دیتے ہوئے کہا کہ اس سے عالمی منڈیوں میں اعتماد بحال ہونے میں مدد ملے گی۔

اپنے بیان میں کئیر اسٹارمر نے معاہدے تک پہنچنے کے لیے ثالثی اور سفارتی رابطوں میں کردار ادا کرنے والے ممالک، بالخصوص پاکستان، قطر اور دیگر شراکت داروں کی کوششوں کو بھی سراہا۔ ان کا کہنا تھا کہ ایسے سفارتی اقدامات عالمی تنازعات کے پائیدار حل میں اہم کردار ادا کرتے ہیں۔

واضح رہے کہ اس سے قبل وزیراعظم شہباز شریف اور امریکی صدر ڈونلڈ ٹرمپ نے امریکا اور ایران کے درمیان امن معاہدہ طے پانے کا اعلان کیا تھا، جس کی بعد ازاں ایرانی حکام نے بھی تصدیق کی۔