لندن: برطانیہ میں روشن مستقبل کی تلاش میں آنے والے اہل پناہ گزینوں کے لیے حکومت نے ایک نئی اور محدود قانونی امیگریشن اسکیم متعارف کرانے کا اعلان کیا ہے، جس کے تحت جامعات، کاروباری ادارے، آجر اور کمیونٹی تنظیمیں پہلی بار منتخب پناہ گزینوں کی اسپانسر شپ کر سکیں گی۔

بین الاقوامی میڈیا رپورٹس کے مطابق برطانوی حکومت رواں سال کے آخر میں اس نئی اسکیم کا آغاز کرے گی، جس کا مقصد ضرورت مند افراد کو محفوظ اور قانونی راستہ فراہم کرنا اور غیر قانونی ذرائع، خصوصاً چھوٹی کشتیوں کے ذریعے برطانیہ پہنچنے کے رجحان کی حوصلہ شکنی کرنا ہے۔

برطانوی وزارتِ داخلہ کے مطابق یہ نظام کینیڈا کے کامیاب کمیونٹی اسپانسر شپ ماڈل سے متاثر ہے۔ اس کے تحت مستند ادارے اقوام متحدہ یا دیگر منظور شدہ ذرائع سے منتخب حقیقی پناہ گزینوں کو برطانیہ منتقل کرنے میں معاونت کریں گے۔

حکومت نے اس منصوبے کے تحت تین نئے قانونی راستے متعارف کرانے کا اعلان کیا ہے۔ پہلا کمیونٹی اسپانسر شپ پروگرام ہے، جس میں رجسٹرڈ کمیونٹی اور فلاحی تنظیمیں اہل پناہ گزینوں کی کفالت کریں گی۔

دوسرا یونیورسٹی اسپانسر شپ پروگرام ہے، جس کے تحت برطانوی جامعات اہل پناہ گزین طلبا کو اعلیٰ تعلیم کے لیے اسپانسر کر سکیں گی۔ اس پروگرام کے لیے درخواستیں رواں سال کے آخر میں طلب کی جائیں گی، جبکہ پہلے منتخب طلبا کی برطانیہ آمد 2027 میں متوقع ہے۔

تیسرا ورک اسپانسر شپ پروگرام ہے، جس کے تحت مخصوص شرائط پوری کرنے والے پناہ گزینوں کو بعض آجر ملازمت کی بنیاد پر برطانیہ لا سکیں گے۔ اس پروگرام کا آغاز بھی آئندہ سال مرحلہ وار کیا جائے گا۔

برطانوی حکومت نے واضح کیا ہے کہ ان قانونی راستوں کے تحت آنے والوں کی تعداد محدود ہوگی اور ہر درخواست گزار کی سخت سیکیورٹی کلیئرنس اور اہلیت کی جانچ کے بعد ہی منظوری دی جائے گی۔

برطانیہ کی وزیرِ داخلہ شبانہ محمود کا کہنا ہے کہ حکومت حقیقی پناہ گزینوں کے لیے محفوظ اور قانونی راستے فراہم کرے گی، تاہم ایسے تمام ذرائع بند کیے جائیں گے جن کے ذریعے ماضی میں امیگریشن نظام کا ناجائز فائدہ اٹھایا جاتا رہا۔

انہوں نے کہا کہ برطانیہ جنگ، ظلم و ستم اور انسانی بحرانوں سے متاثر افراد کو تحفظ دینے کی اپنی روایت برقرار رکھے گا، لیکن ساتھ ہی امیگریشن نظام کو منصفانہ، منظم اور عوام کے اعتماد کے مطابق بنانا بھی حکومت کی ترجیح ہے۔

اس اعلان کے ساتھ ہی حکومت نے امیگریشن قوانین مزید سخت کرنے کا بھی فیصلہ کیا ہے۔ مجوزہ قانون کے تحت انسانی حقوق اور جدید غلامی سے متعلق قوانین میں ترامیم کی جائیں گی تاکہ جعلی یا بے بنیاد پناہ کی درخواستوں کی حوصلہ شکنی کی جا سکے۔