اسلام آباد: نائب وزیراعظم اور وزیر خارجہ سینیٹر محمد اسحاق ڈار سے برطانیہ کی وزیر خارجہ یوویٹ کوپر نے ٹیلیفون پر رابطہ کیا، جس میں علاقائی امن، سفارتی تعاون اور باہمی دلچسپی کے اہم امور پر تفصیلی تبادلہ خیال کیا گیا۔

دفتر خارجہ کے مطابق گفتگو کے دوران برطانوی وزیر خارجہ نے خطے میں امن و استحکام کے لیے پاکستان کے کلیدی کردار کو سراہتے ہوئے ملک کی مسلسل سفارتی کوششوں کی تعریف کی۔

اعلامیے میں کہا گیا کہ یوویٹ کوپر نے بالخصوص پاکستان کی ان سفارتی کوششوں کا ذکر کیا، جن کے نتیجے میں امریکا اور ایران کے درمیان تاریخی اسلام آباد مفاہمتی یادداشت پر دستخط ممکن ہوئے۔ برطانیہ نے اس پیش رفت کو عالمی سفارت کاری میں پاکستان کی ایک اہم کامیابی قرار دیا۔

اس موقع پر اسحاق ڈار نے پاکستان کے اصولی مؤقف کا اعادہ کرتے ہوئے کہا کہ پاکستان خطے میں امن، مذاکرات، سفارت کاری اور تعمیری روابط کے فروغ کے لیے اپنی کوششیں جاری رکھے گا۔ انہوں نے کہا کہ پاکستان ہمیشہ تنازعات کے پرامن حل اور علاقائی استحکام کا حامی رہا ہے۔

ٹیلیفونک گفتگو کے اختتام پر دونوں رہنماؤں نے عالمی اور علاقائی چیلنجز سے نمٹنے کے لیے قریبی رابطہ برقرار رکھنے اور باہمی دلچسپی کے امور پر اعلیٰ سطح کی مشاورت جاری رکھنے پر اتفاق کیا۔