لندن: برطانوی ہوم سیکرٹری شبانہ محمود نے کہا ہے کہ برطانیہ کو ایران کی جانب سے متعدد سنگین نوعیت کے خطرات کا سامنا ہے۔

غیر ملکی میڈیا رپورٹس کے مطابق شبانہ محمود کا یہ بیان مانچسٹر کی یہودی کمیونٹی کے خلاف مبینہ دشمنانہ کارروائی کی منصوبہ بندی کے الزام میں 2 ایرانی شہریوں پر فردِ جرم عائد کیے جانے کے بعد سامنے آیا۔

شبانہ محمود نے الزام عائد کیا کہ تہران حکومت برطانیہ میں موجود یہودی برادری کو نشانہ بناتی ہے اور بیرونِ ملک اپنے ناقدین کو خاموش کرانے کی کوشش کرتی ہے۔ ان کے مطابق ایران اپنی مداخلت کو چھپانے کے لیے پراکسی گروہوں اور جرائم پیشہ نیٹ ورکس کا استعمال کرتا ہے۔

کاؤنٹر ٹیررازم پولیسنگ کے مطابق مانچسٹر میں مذکورہ الزامات کے تحت گرفتار کیے گئے 36 سالہ سلام احمدیان اور 34 سالہ رحمان صالحی کے بارے میں تحقیقات سے معلوم ہوا کہ مبینہ سازش کے سلسلے میں ان کے ایسے تیسرے فریق سے رابطے تھے جو ممکنہ طور پر ایران میں موجود ہو سکتے ہیں۔

شبانہ محمود کے مطابق گرفتار افراد میں سے ایک 2020ء جبکہ دوسرا 2023ء میں چھوٹی کشتی کے ذریعے برطانیہ پہنچا تھا۔ ان میں سے ایک شخص کو پناہ دے دی گئی تھی جبکہ دوسرے کی پناہ کی درخواست زیرِ غور ہے۔

دوسری جانب ریفارم یوکے کے رہنما نائیجل فراج نے کہا ہے کہ برطانیہ کی سرحدوں پر ہنگامی صورتحال پیدا ہو چکی ہے اور حکومت ان عوامل سے نمٹنے میں ناکام رہی ہے جو ان کے بقول کمیونٹیز میں دہشت اور خوف پیدا کر رہے ہیں۔

نائیجل فراج نے مزید کہا کہ اگر ہوم سیکرٹری ان کے مؤقف سے اختلاف کرتی ہیں تو انہیں مستعفی ہو جانا چاہیے۔