لندن: برطانیہ کے نئے وزیراعظم اینڈی برنہم نے امریکا کو ایران کے خلاف دفاعی کارروائیوں کے لیے برطانوی فوجی اڈے استعمال کرنے کی اجازت دے دی ہے، جس سے سابق حکومت کی پالیسی برقرار رکھی گئی ہے۔

غیر ملکی خبر رساں ادارے بلوم برگ کے مطابق برطانوی حکومت نے فیصلہ کیا ہے کہ امریکا ایران کے خلاف ان فوجی کارروائیوں میں برطانیہ کے اڈے استعمال کر سکے گا جنہیں لندن دفاعی نوعیت کی کارروائیاں قرار دیتا ہے۔

رپورٹ کے مطابق یہ پالیسی سابق وزیراعظم کیئر اسٹارمر کے دور میں اختیار کی گئی تھی اور نئی حکومت نے بھی اسے برقرار رکھنے کا فیصلہ کیا ہے، جبکہ امریکی صدر ڈونلڈ ٹرمپ ایران کے خلاف اپنی فوجی سرگرمیوں میں اضافہ کر رہے ہیں۔

ذرائع کا کہنا ہے کہ کیئر اسٹارمر نے گزشتہ جمعہ سینئر وزرا اور اعلیٰ حکام کا اہم اجلاس طلب کیا تھا، جس میں رواں ماہ امریکی فوجی کارروائیوں کے دوبارہ آغاز کے بعد برطانیہ کی حکمت عملی کا جائزہ لیا گیا۔

اجلاس میں فیصلہ کیا گیا کہ ڈیاگو گارسیا اور آر اے ایف فیئرفورڈ کے فوجی اڈے امریکی طیاروں کے استعمال کے لیے بدستور دستیاب رہیں گے، تاکہ وہ ایرانی میزائل خطرات کا مقابلہ کرنے اور آبنائے ہرمز سے متعلق اہداف پر کارروائیاں جاری رکھ سکیں۔

رپورٹ میں بتایا گیا ہے کہ پیر کے روز وزارتِ عظمیٰ کا منصب سنبھالنے والے اینڈی برنہم کو اجلاس میں ہونے والے فیصلوں سے آگاہ کیا گیا، جس پر انہوں نے اتفاق کیا۔ ذرائع کے مطابق وہ دفاعی امریکی کارروائیوں کے لیے برطانوی فوجی اڈوں کی فراہمی سے متعلق سابق حکومت کی پالیسی کو ہی جاری رکھیں گے۔

اس فیصلے کے بعد امکان ظاہر کیا جا رہا ہے کہ امریکا ایران کے خلاف جاری بعض فوجی آپریشنز کے مختلف مراحل میں برطانوی فوجی اڈوں سے بھی استفادہ کر سکتا ہے۔