انقرہ: غزہ کے لیے انسانی امداد لے جانے والے عالمی صمود فلوٹیلا کو بین الاقوامی پانیوں میں روکنے اور اس میں موجود کارکنوں کو حراست میں لیے جانے کے معاملے پر ترکیہ نے اسرائیلی وزیراعظم نیتن یاہو کے خلاف کارروائی کے لیے انٹرپول سے رابطہ کرلیا۔

غیر ملکی میڈیا رپورٹس کے مطابق ترک وزارت انصاف نے نیتن یاہو اور اسرائیلی شہری افیک موسکووچ کے خلاف انٹرپول سے ریڈ نوٹس جاری کرنے کی درخواست کی ہے۔ ترک حکام کا مؤقف ہے کہ غزہ فلوٹیلا کے خلاف کارروائی کے دوران نسل کشی، انسانیت کے خلاف جرائم اور بین الاقوامی پانیوں میں بحری جہازوں پر حملے سمیت سنگین جرائم کا ارتکاب کیا گیا۔

ترک وزیر انصاف آکن گورلیک نے جمعے کو سماجی رابطے کی ویب سائٹ ایکس پر جاری بیان میں تصدیق کی کہ نیتن یاہو اور افیک موسکووچ کے خلاف انٹرپول ریڈ نوٹس کے اجرا کی درخواست کی گئی ہے۔

آکن گورلیک کے مطابق یہ درخواست ترکیہ میں جاری ایک مقدمے کا حصہ ہے، جس میں 2025 کے دوران غزہ کے لیے انسانی امداد لے جانے والے عالمی صمود فلوٹیلا کو بین الاقوامی پانیوں میں روکنے اور اس پر سوار کارکنوں کو حراست میں لینے کے واقعے کی تحقیقات کی جارہی ہیں۔

ترک وزیر انصاف نے بتایا کہ اس واقعے سے متعلق استنبول کی 11ویں ہائی کریمنل کورٹ میں 35 ملزمان کے خلاف عدالتی کارروائی جاری ہے، جن میں اسرائیلی وزیراعظم نیتن یاہو اور افیک موسکووچ بھی شامل ہیں۔

ترکیہ کی جانب سے انٹرپول سے رابطہ ایسے وقت میں کیا گیا ہے جب غزہ میں جاری جنگ اور اسرائیلی کارروائیوں پر عالمی سطح پر قانونی اور سیاسی دباؤ میں اضافہ ہورہا ہے۔ ترک حکام کا کہنا ہے کہ فلوٹیلا کے خلاف کارروائی بین الاقوامی قوانین کی خلاف ورزیوں کے زمرے میں آتی ہے اور اس میں ملوث افراد کے خلاف قانونی کارروائی ہونی چاہیے۔