واشنگٹن ڈی سی: امریکی وفاقی اپیل عدالت نے صدر ڈونلڈ ٹرمپ کی انتظامیہ کو وائٹ ہاؤس میں 400 ملین ڈالر مالیت کے نئے بال روم کی تعمیر روکنے کا حکم دے دیا ہے۔

امریکی میڈیا رپورٹس کے مطابق واشنگٹن کی وفاقی اپیل عدالت نے قرار دیا کہ وائٹ ہاؤس کے بنیادی ڈھانچے میں بڑی تبدیلی کانگریس کی منظوری کے بغیر نہیں کی جا سکتی۔ عدالت نے دو کے مقابلے میں ایک جج کی اکثریتی رائے سے فیصلہ سناتے ہوئے کہا کہ امریکی صدر وائٹ ہاؤس کے عارضی مکین ہوتے ہیں، اس کے مالک نہیں، اس لیے عمارت میں بڑے پیمانے پر تعمیراتی تبدیلی کے لیے متعلقہ قانونی تقاضے پورے کرنا ضروری ہیں۔

یہ مقدمہ نیشنل ٹرسٹ فار ہسٹورک پریزرویشن کی جانب سے دائر درخواست کے بعد سامنے آیا۔ درخواست گزار تنظیم نے مؤقف اختیار کیا تھا کہ ٹرمپ انتظامیہ نے کانگریس کی منظوری حاصل کیے بغیر وائٹ ہاؤس کے ایسٹ ونگ کو مسمار کرکے تقریباً 90 ہزار مربع فٹ رقبے پر مشتمل نئے بال روم کی تعمیر شروع کی۔

عدالت نے اپنے فیصلے پر 14 روز کے لیے عملدرآمد روک دیا ہے تاکہ ٹرمپ انتظامیہ چاہے تو اس دوران امریکی سپریم کورٹ سے رجوع کر سکے۔ تاہم اس عبوری مدت کے دوران کانگریس کی منظوری کے بغیر زمین کے اوپر تعمیراتی کام آگے بڑھانے کی اجازت نہیں ہوگی۔

ٹرمپ انتظامیہ کا مؤقف ہے کہ نیا بال روم وائٹ ہاؤس میں بڑے سرکاری پروگراموں اور اہم تقریبات کے انعقاد کے لیے ضروری ہے۔ انتظامیہ کے مطابق موجودہ سہولیات میں جگہ کی کمی کے باعث بڑے اجتماعات کے لیے مناسب انتظامات کرنا مشکل ہوتا ہے، جبکہ نئی تعمیر سیکیورٹی ضروریات کو بھی بہتر انداز میں پورا کرے گی۔

دوسری جانب تاریخی عمارت کے تحفظ کے لیے کام کرنے والی تنظیم کا کہنا ہے کہ وائٹ ہاؤس میں اس نوعیت کی بڑی تبدیلی محض انتظامی فیصلہ نہیں بلکہ اس کے لیے قانونی اور تاریخی تحفظات کو مدنظر رکھنا ضروری ہے۔

عدالتی فیصلے کے بعد بال روم منصوبے کو عارضی طور پر روک دیا گیا ہے اور اب ٹرمپ انتظامیہ کے لیے اگلا اہم مرحلہ امریکی سپریم کورٹ سے رجوع کرنے یا کانگریس کی منظوری حاصل کرنے کی صورت میں سامنے آ سکتا ہے۔