واشنگٹن: امریکی صدر ڈونلڈ ٹرمپ نے سعودی عرب، پاکستان اور ترکیہ کے درمیان طے پانے والے مکہ مشترکہ دفاعی معاہدے کا خیرمقدم کرتے ہوئے اسے خطے میں اتحاد اور مشترکہ دفاع کی جانب اہم پیش رفت قرار دیا ہے۔

امریکی صدر نے اپنے سوشل میڈیا پلیٹ فارم ٹروتھ سوشل پر جاری بیان میں کہا کہ انہیں یہ دیکھ کر خوشی ہوئی کہ سعودی عرب، پاکستان اور ترکیہ نے مکہ مشترکہ دفاعی معاہدے پر دستخط کیے ہیں۔

ڈونلڈ ٹرمپ نے کہا کہ یہ معاہدہ اس بات کی علامت ہے کہ مشرق وسطیٰ کے ممالک متحد ہو رہے ہیں اور اب وہ اپنی سلامتی اور دفاع کو زیادہ مؤثر انداز میں یقینی بنانے کی پوزیشن میں ہوں گے۔

امریکی صدر نے سعودی عرب، پاکستان اور ترکیہ کی قیادت کو معاہدے پر مبارکباد دیتے ہوئے اسے ایک بڑا، جرات مندانہ اور اہم پہلا قدم قرار دیا۔

خیال رہے کہ گزشتہ دنوں سعودی عرب، پاکستان اور ترکیہ نے مکہ مکرمہ میں مشترکہ دفاعی معاہدے پر دستخط کیے تھے۔ معاہدے کے تحت تینوں ممالک میں سے کسی ایک کے خلاف مسلح حملہ تینوں ممالک کے خلاف حملہ تصور کیا جائے گا۔

مکہ دفاعی معاہدے کا بنیادی مقصد کسی بھی جارحیت کے خلاف مشترکہ دفاعی صلاحیت کو مضبوط بنانا اور تینوں ممالک کے درمیان دفاعی تعاون کو مزید فروغ دینا ہے۔

معاہدے کے تحت سعودی عرب، پاکستان اور ترکیہ دفاعی شعبے میں باہمی تعاون بڑھانے کے ساتھ ساتھ مشترکہ سلامتی کے لیے قریبی رابطہ کاری بھی جاری رکھیں گے۔

امریکی صدر کی جانب سے معاہدے کا خیرمقدم اس لحاظ سے بھی اہم قرار دیا جا رہا ہے کہ واشنگٹن نے اس نئی علاقائی دفاعی پیش رفت کو مثبت انداز میں دیکھا ہے۔