امریکی صدر ڈونلڈ ٹرمپ نے دعویٰ کیا ہے کہ ایران کی فوجی صلاحیت کو بڑی حد تک تباہ کر دیا گیا ہے، جبکہ خبردار کیا ہے کہ اگر ضرورت پڑی تو ایران کے خلاف مزید سخت کارروائیاں بھی کی جائیں گی۔ انہوں نے یہ بھی کہا کہ تہران مستقبل میں کبھی جوہری ہتھیار حاصل نہیں کر سکے گا۔

غیر ملکی ذرائع ابلاغ کے مطابق کیمپ ڈیوڈ میں کابینہ کے اجلاس سے خطاب کرتے ہوئے ڈونلڈ ٹرمپ نے کہا کہ مشرق وسطیٰ میں جاری تنازع کے نتیجے میں ایران کی صورتحال انتہائی کمزور ہو چکی ہے۔ ان کے بقول ایران کے پاس اب بھی کچھ فوجی صلاحیت موجود ہے، تاہم وہ بھی زیادہ دیر برقرار نہیں رہے گی۔

امریکی صدر نے ایران کے خلاف فوجی کارروائیوں کو کامیاب قرار دیتے ہوئے کہا کہ ایرانی فوج کو شدید نقصان پہنچایا گیا ہے اور اس کی دفاعی پیداوار کی صلاحیت بھی تقریباً ختم ہو چکی ہے۔ انہوں نے اپنی حکومت کی کارکردگی کا موازنہ ماضی کی امریکی جنگی مہمات سے کرتے ہوئے کہا کہ ان کی انتظامیہ نے صرف پانچ ماہ میں وہ نتائج حاصل کیے ہیں جن کے لیے ماضی میں برسوں درکار تھے۔

جنگ بندی کے امکانات سے متعلق سوال پر ٹرمپ نے کہا کہ امریکا کا مقصد صرف کامیابی حاصل کرنا ہے۔ ان کے مطابق ایران کی فوج کو کمزور کر دیا گیا ہے اور واشنگٹن اس بات کو یقینی بنائے گا کہ تہران کبھی بھی جوہری ہتھیار بنانے میں کامیاب نہ ہو۔

صحافیوں سے گفتگو کرتے ہوئے امریکی صدر نے مزید دعویٰ کیا کہ ایران کی فوجی قیادت اور عسکری ڈھانچے کو شدید نقصان پہنچایا جا چکا ہے۔ تاہم انہوں نے ان دعوؤں کے حق میں کوئی شواہد پیش نہیں کیے۔

ایران کے ساتھ ممکنہ مذاکرات پر بات کرتے ہوئے ٹرمپ نے کہا کہ انہیں ایرانی قیادت پر اعتماد نہیں رہا کیونکہ ان کے بقول تہران مذاکرات کی خواہش ظاہر کرتا ہے لیکن اپنے وعدوں پر قائم نہیں رہتا۔ انہوں نے الزام عائد کیا کہ مذاکرات کے دوران بھی ایران نے پانچ میزائل داغے، جنہیں امریکی دفاعی نظام نے تباہ کر دیا۔

ڈونلڈ ٹرمپ نے اپنے خطاب میں امریکی مسلح افواج کی استعداد بڑھانے کے لیے دفاعی بجٹ میں نمایاں اضافے کا بھی اعلان کیا۔ ان کا کہنا تھا کہ افواج کی جدید کاری اور صلاحیت میں اضافے کے لیے تقریباً 1.5 ٹریلین ڈالر کی سرمایہ کاری کی جا رہی ہے۔