امریکا کے صدر ڈونلڈ ٹرمپ نے کہا ہے کہ ایران کے ساتھ مذاکرات جاری ہیں اور وہ امید کرتے ہیں کہ دونوں ممالک کے درمیان معاملات خوش اسلوبی سے آگے بڑھیں گے۔ انہوں نے ایک بار پھر واضح کیا کہ ایران کو ایٹمی ہتھیار حاصل کرنے کی اجازت نہیں دی جا سکتی۔

تقریب سے خطاب کرتے ہوئے صدر ڈونلڈ ٹرمپ نے کہا کہ وہ ایران کے ساتھ معاہدہ کرنا چاہتے ہیں کیونکہ ان کی خواہش ہے کہ مزید جانی نقصان نہ ہو۔ ان کا کہنا تھا کہ ایران کے ساتھ بات چیت جاری ہے اور آئندہ پیش رفت کے لیے انتظار کرنا ہوگا۔

اس سے قبل ایک امریکی ٹی وی کو دیے گئے انٹرویو میں صدر ٹرمپ نے کہا کہ اصل اہمیت صرف عملی اقدامات کی ہے۔ ان کے مطابق ایران معاہدہ کرنا چاہتا ہے، تاہم یہ دیکھنا ہوگا کہ مذاکرات کس سمت میں جاتے ہیں۔

امریکی صدر نے کہا کہ ان کے خیال میں آبنائے ہرمز جلد مکمل طور پر کھل جائے گی اور موجودہ معاملہ زیادہ پیچیدہ نہیں۔ انہوں نے کہا کہ آبنائے ہرمز کی بحالی پہلا مرحلہ ہوگا، جبکہ اس کے بعد ایران کے جوہری پروگرام سے متعلق مذاکرات کا آغاز ہوگا۔

ٹرمپ نے مزید کہا کہ اگر ایران معاہدہ نہیں کرتا تو اس کا سب سے زیادہ نقصان خود ایران کو ہوگا۔

دوسری جانب ایران کے نائب وزیر خارجہ کاظم غریب آبادی نے کہا ہے کہ ایران اور عمان کے درمیان آبنائے ہرمز میں نئے بحری راستے کے قیام پر اصولی اتفاق رائے ہو گیا ہے۔ ان کے مطابق نئے عارضی بحری راستے کی تیاری مکمل کر لی گئی ہے اور یہ راستہ زیادہ تر ایرانی سمندری حدود سے گزرے گا۔

ایرانی نائب وزیر خارجہ کا کہنا تھا کہ نئے بحری راستے کا مقصد بحری آمدورفت کو منظم بنانا اور خطے میں تجارتی سرگرمیوں کو بہتر انداز میں جاری رکھنا ہے۔