واشنگٹن ڈی سی:امریکی صدر ڈونلڈ ٹرمپ نے کہا ہے کہ ایران کے ساتھ کل معاہدے پر دستخط ہونگے،غیر ملکی میڈیا رپورٹس کے مطابق صدر ڈونلڈ ٹرمپ کا کہنا ہے کہ ایران کےساتھ معاہدے پر دستخط ہوتے ہی آبنائے ہرمز سب کیلئے کھل جائے گا۔۔انہوں نے مزید کہا کہ معاہدے کے بعد جب حالات نارمل ہو جائیں گے تو ایرانی جوہری موا د کی باقیات کو قبضہ میں لے لیا جائے گا۔

جاری بیان میں امریکی صدر نے مزید کہا کہ ان کی انتظامیہ کے ماضی کی امریکی حکومتوں کے مقابلے میں ایران کے ساتھ زیادہ بہتر تعلقات ہیں،ایران پر حملوں کے نتیجے میں ہونے والے نقصانات کے ہرجانے کے معاملے پر ٹرمپ کا کہنا تھا کہ اس معاہدے کے تحت ایران کو کسی قسم کی مالی ادائیگی نہیں کی جائے گی۔ ٹروتھ سوشل پر جاری بیان میں ٹرمپ نے کہا کہ اوباما کا ایران سے معاہدہ ایسا آسان، خوبصورت اور ہموار راستہ تھا جو ایٹمی ہتھیار تک لے جاتا اور ایران 6 سال پہلے ہی جوہری ہتھیار حاصل کرلیتا اور اب تک استعمال بھی کر چکا ہوتا۔انہوں نے یہ دعویٰ بھی کیا کہ ایران اب جوہری ہتھیار حاصل کرنے کا خواہش مند نہیں ہے اور وہ اب ان ہتھیاروں کی خریداری، تیاری یا کسی اور ذریعے سے حاصل کرنے کی کوشش بھی نہیں کر سکے گا۔

ٹرمپ کے مطابق ایران کے ساتھ ہمارا تعلق سابقہ انتظامیہ کے مقابلے میں بالکل مختلف اور بہتر ہے۔ اوباما کی طرف سے انہیں دیے گئے سیکڑوں ارب ڈالر اور 1.7 ارب ڈالر نقد کے برعکس، اس معاہدے میں کوئی رقم کا تبادلہ نہیں ہوگا۔ مناسب وقت پر جب حالات مکمل طور پر پرسکون ہو جائیں گے ہم جائیں گے اور ایٹمی مواد حاصل کرلیں گے۔

خیال رہے کہ اس سے قبل وزیر اعظم شہباز شریف ایکس پر جاری بیان میں کہا تھا کہ امریکہ اور ایران کے مابین معاہد ہ اگلے چوبیس گھنٹوں میں ہونے کا امکان ہے ، اس حوالے سے فریقین کے مابین الیکٹرونک دستخط کیلئے تیاریاں جاری ہیں، بعدا زاں امریکی صدر ڈونلڈ ٹرمپ نے شہبا ز شریف کے ایکس پر جاری بیان کو ری شئیر کرتے ہوئے اس کی تصدیق کی تھی۔