واشنگٹن ڈی سی:امریکی صدر ڈونلڈ ٹرمپ نے کہا ہے کہ اگر حالات نے تقاضا کیا تو وہ لبنان کی مزاحمتی تنظیم حزب اللہ سے بھی براہِ راست مذاکرات کرنے کے لیے تیار ہیں۔ ان کا کہنا تھا کہ بعض اوقات ایسے فریقوں سے بھی بات کرنا پڑتی ہے جن سے اکثر لوگ مذاکرات کے حق میں نہیں ہوتے، کیونکہ مسائل کا حل مکالمے سے ہی نکلتا ہے۔

غیر ملکی میڈیا رپورٹس کے مطابق وائٹ ہاؤس میں لبنان کے صدر جوزف عون کے ساتھ مشترکہ گفتگو کرتے ہوئے ڈونلڈ ٹرمپ نے ایران سے متعلق متعدد دعوے بھی کیے۔ انہوں نے کہا کہ امریکی فوج ایران کی عسکری صلاحیتوں کو غیر معمولی حد تک کمزور کر رہی ہے اور اس سطح کا دباؤ پہلے کبھی نہیں دیکھا گیا۔

صدر ٹرمپ نے یہ بھی تسلیم کیا کہ ایران اردن میں حملہ کرنے میں کامیاب رہا۔ ان کے بقول اگر وہاں دوسرے آپریٹرز موجود ہوتے تو حملہ کامیاب نہ ہو پاتا، تاہم انہوں نے یہ واضح نہیں کیا کہ وہ کن آپریٹرز کا حوالہ دے رہے تھے۔

ایران کے ساتھ ممکنہ مذاکرات کے حوالے سے امریکی صدر نے کہا کہ تہران پس پردہ جنگ کے خاتمے کے لیے رابطے اور بات چیت کا خواہاں ہے، لیکن امریکا اس وقت تک کسی ملاقات میں دلچسپی نہیں رکھتا جب تک ایران سنجیدہ اور بامعنی مذاکرات کے لیے تیار نہ ہو جائے۔ ان کا کہنا تھا کہ ایران شدید دباؤ میں ہے اور اسی لیے مذاکرات کے لیے بے چین دکھائی دیتا ہے۔

ایک صحافی کے سوال پر ڈونلڈ ٹرمپ نے کہا کہ اگر لبنان کے صدر جوزف عون درخواست کریں تو وہ حزب اللہ سے بھی براہِ راست بات چیت کرنے پر آمادہ ہیں۔ انہوں نے کہا کہ وہ ماضی میں بھی ایسے افراد اور گروہوں سے گفتگو کر چکے ہیں جن سے اکثر لوگ بات کرنے کے خلاف ہوتے ہیں، تاہم بعض اوقات یہی طریقہ تنازعات کے حل میں مددگار ثابت ہوتا ہے۔

اس موقع پر لبنان کے صدر جوزف عون نے ڈونلڈ ٹرمپ کی تعریف کرتے ہوئے انہیں ایک عظیم صدر قرار دیا۔ اس پر ٹرمپ نے مسکراتے ہوئے طنزیہ انداز میں کہا کہ اب صدر عون جو بھی مطالبہ کریں گے، انہیں سب کچھ مل سکتا ہے۔