نیوزڈیسک:امریکی صدر ڈونلڈ ٹرمپ اور روسی صدر ولادیمیر پیوٹن کے درمیان ٹیلیفونک رابطہ ہوا ہے جس کے دوران ایران، یوکرین اور دیگر اہم عالمی معاملات پر تفصیلی تبادلہ خیال کیا گیا۔

غیر ملکی میڈیا کے مطابق دونوں رہنماؤں کے درمیان تقریباً ایک گھنٹے تک جاری رہنے والی گفتگو میں دوطرفہ تعلقات سمیت مختلف بین الاقوامی امور زیر بحث آئے۔ اس موقع پر صدر پیوٹن نے ٹرمپ کو ان کی 80ویں سالگرہ پر مبارکباد بھی پیش کی۔

ٹرمپ نے مبارکباد پر شکریہ ادا کرتے ہوئے کہا کہ پیوٹن ان کی سالگرہ پر مبارکباد دینے والے پہلے غیر ملکی رہنما تھے۔

گفتگو کے دوران امریکی صدر نے روسی ہم منصب کو امریکا اور ایران کے درمیان جاری سفارتی پیش رفت سے بھی آگاہ کیا اور بتایا کہ دونوں ممالک کے درمیان ایک معاہدے کا اعلان جلد متوقع ہے۔

روسی ذرائع کے مطابق صدر پیوٹن نے ایران اور امریکا کے درمیان تنازع کے سفارتی حل کی جانب ہونے والی پیش رفت کا خیر مقدم کیا اور اس عمل پر اطمینان کا اظہار کیا۔

دونوں رہنماؤں نے یوکرین جنگ پر بھی تبادلہ خیال کیا۔ کریملن کے مطابق صدر ٹرمپ نے جنگ کے خاتمے کی ضرورت پر زور دیتے ہوئے کہا کہ وہ اس مقصد کے حصول کے لیے یوکرین اور یورپی شراکت داروں کے ساتھ تعاون جاری رکھنے کے لیے تیار ہیں۔