واشنگٹن: امریکی صدر ڈونلڈ ٹرمپ نے ایران کے خلاف جنگ میں جنوبی کوریا کی جانب سے امریکا کا ساتھ نہ دینے پر ناراضی کا اظہار کرتے ہوئے دونوں ممالک کے درمیان مشترکہ فوجی مشقیں کم کرنے کی ہدایت کردی ہے۔

غیر ملکی میڈیا رپورٹس کے مطابق ڈونلڈ ٹرمپ نے کہا ہے کہ انہوں نے امریکی وزیر دفاع کو جنوبی کوریا کے ساتھ ہونے والی فوجی مشقوں میں کمی لانے کی ہدایت کی ہے۔ امریکی صدر کا کہنا تھا کہ اگرچہ موجودہ مشقوں کو مکمل طور پر منسوخ کرنے میں بہت دیر ہوچکی ہے، تاہم وہ اس بات پر خوش نہیں کہ امریکا نے پہلے ان میں شرکت پر رضامندی ظاہر کی تھی۔

ٹرمپ نے مشترکہ فوجی مشقوں پر تنقید کرتے ہوئے کہا کہ یہ سرگرمیاں امریکا کے لیے انتہائی مہنگی ثابت ہوتی ہیں۔ ان کے بقول ایسی مشقیں شمالی کوریا کو ایک نامناسب اور جارحانہ پیغام بھی دیتی ہیں۔

امریکی صدر نے مزید کہا کہ شمالی کوریا نے ان کی موجودہ مدتِ صدارت کے دوران امریکا کے لیے کوئی خطرہ پیدا نہیں کیا اور پیانگ یانگ نے ہمیشہ واشنگٹن کے ساتھ احترام کا رویہ اختیار کیا ہے۔

ٹرمپ نے شمالی کوریا کے رہنما کم جونگ اُن کے ساتھ اپنے تعلقات کا بھی ذکر کرتے ہوئے کہا کہ ان کے کم جونگ اُن کے ساتھ بہت اچھے تعلقات ہیں۔

واضح رہے کہ امریکا اور جنوبی کوریا کی سالانہ مشترکہ فوجی مشقیں آج سے شروع ہو کر 27 اگست تک جاری رہیں گی۔ ان مشقوں کا مقصد دونوں ممالک کی افواج کے درمیان مشترکہ دفاعی تیاری اور عسکری تعاون کو بہتر بنانا ہے۔

ٹرمپ کے تازہ بیان سے ظاہر ہوتا ہے کہ ایران کے خلاف جنگ میں جنوبی کوریا کے کردار کے معاملے نے واشنگٹن اور سیول کے درمیان دفاعی تعاون کے حوالے سے نئی بحث کو جنم دیا ہے۔