انقرہ:امریکی صدر ڈونلڈ ٹرمپ نے نیٹو سربراہی اجلاس کے دوران اسپین پر شدید تنقید کرتے ہوئے امریکی حکام کو اسپین کے ساتھ تمام تجارتی سرگرمیاں فوری طور پر معطل کرنے کی ہدایت دے دی، جس کے بعد دونوں اتحادی ممالک کے درمیان سفارتی کشیدگی میں اضافہ دیکھنے میں آیا۔

غیر ملکی میڈیا رپورٹس کے مطابق انقرہ میں ہونے والے نیٹو اجلاس کے دوران یورپی رہنما اتحاد کے اندر موجود اختلافات ختم کرنے کی کوششوں میں مصروف تھے، تاہم صدر ٹرمپ نے اپنی گفتگو میں اسپین کو ہدفِ تنقید بناتے ہوئے اسے "نامناسب اتحادی" قرار دیا اور کہا کہ وہ امریکا کے ساتھ تعاون کے معاملات میں آمادہ نہیں ہوتا۔

اجلاس کے دوران ٹرمپ نے نیٹو کے سیکریٹری جنرل مارک روٹے سے گفتگو کرتے ہوئے کہا کہ اسپین ہمیشہ اختلافی مؤقف اختیار کرتا ہے اور امریکا کو اس کا بوجھ مزید نہیں اٹھانا چاہیے۔ انہوں نے واضح الفاظ میں کہا کہ وہ اسپین کے ساتھ تجارت جاری رکھنے کے خواہش مند نہیں۔

صدر ٹرمپ نے امریکی وزیر خزانہ اسکاٹ بیسنٹ کو ہدایت کی کہ اسپین کے ساتھ تجارتی سرگرمیاں فوری طور پر روکنے کے لیے ضروری اقدامات کیے جائیں۔ ان کا کہنا تھا کہ اسپین امریکا سے غیر متوازن معاشی فوائد حاصل کر رہا ہے، تاہم اب صورتحال تبدیل ہوگی اور اسپین کو اس کے معاشی اثرات کا سامنا کرنا پڑے گا۔

اسی اجلاس کے دوران ٹرمپ نے ایک مرتبہ پھر گرین لینڈ پر امریکی کنٹرول کی خواہش کا اظہار کیا، جس پر ڈنمارک نے سخت ردعمل دیتے ہوئے کہا کہ وہ اپنی سرزمین کے ایک ایک انچ کا دفاع کرے گا اور اپنی خودمختاری پر کسی قسم کا سمجھوتہ نہیں کیا جائے گا۔

دوسری جانب اسپین کے وزیر اعظم کے دفتر نے ٹرمپ کے بیانات پر ردعمل دیتے ہوئے کہا کہ واشنگٹن کے ساتھ دوطرفہ تعلقات برقرار رکھنے کی پالیسی میں کوئی تبدیلی نہیں کی جا رہی۔ بیان میں کہا گیا کہ اسپین ان بیانات کو معمول کی سیاسی گفتگو سمجھتا ہے اور دونوں ممالک کے درمیان تعاون جاری رہے گا۔

اسپین نے یہ بھی واضح کیا کہ امریکا کے ساتھ تجارتی اعداد و شمار ٹرمپ کے دعووں کی تائید نہیں کرتے، کیونکہ اسپین کو امریکا کے ساتھ تجارتی خسارے کا سامنا ہے۔ حکام کے مطابق اسپین امریکا سے زیادہ درآمدات کرتا ہے جبکہ برآمدات نسبتاً کم ہیں۔ مزید برآں، یورپی یونین کے مشترکہ تجارتی نظام کے تحت کسی ایک رکن ملک کے خلاف الگ سے تجارتی پابندیاں عائد کرنا قانونی اور عملی طور پر آسان نہیں، کیونکہ یورپی ممالک کی تجارتی پالیسی مشترکہ فریم ورک کے تحت چلائی جاتی ہے۔