واشنگٹن ڈی سی: امریکی صدر ڈونلڈ ٹرمپ نے ایران کے خلاف سخت فوجی کارروائی کا عندیہ دیتے ہوئے کہا ہے کہ امریکا آج رات ایران کو انتہائی سخت نشانہ بنائے گا،جبکہ انہوں نے جزیرہ خارگ اور دیگر اہم مقامات پر موجود تیل کے انفراسٹرکچر کا کنٹرول سنبھالنے کا عندیہ بھی دیا۔

تفصیلات کے مطابق ٹرتھ سوشل پر جاری اپنے بیان میں صدر ٹرمپ نے دعویٰ کیا کہ ایران کی بحریہ، فضائیہ، ریڈار نظام، فضائی دفاع اور دیگر دفاعی صلاحیتوں سمیت اس کی بیشتر جارحانہ عسکری قوت ختم ہو چکی ہے۔

ٹرتھ سوشل پرجاری بیا ن میں انہوں نے کہا کہ مستقبل قریب میں امریکا جزیرہ خارگ اور ایران کے دیگر اہم تیل انفراسٹرکچر مقامات کا کنٹرول سنبھال لے گا، امریکا ایران کی تیل اور گیس منڈیوں کا مکمل انتظام سنبھالنے کی پوزیشن میں ہوگا۔

علاوہ ازاںاپنے بیان میں امریکی صدر نے اپنے بیان میں وینزویلا کی مثال دیتے ہوئے کہا کہ جس طرح امریکا نے وہاں توانائی کے شعبے میں اقدامات کیے اور وہ امریکا و وینزویلا دونوں کے لیے فائدہ مند ثابت ہوئے، اسی طرز کا ماڈل ایران کے حوالے سے بھی اختیار کیا جا سکتا ہے۔

صدر ٹرمپ کے اس بیان نے خطے میں کشیدگی کے مزید بڑھنے کے خدشات کو جنم دیا ہے، جبکہ ایران کی جانب سے تاحال اس بیان پر کوئی باضابطہ ردعمل سامنے نہیں آیا۔

خیال رہے کہ گزشتہ رات بھی امریکی صدر نے اپاچی ہیلی کاپٹر کو گرائے جانے کے ردعمل میں ایران میں اہم مقامات پر فضائی حملے کیے تھے، جس کا ایران کی جانب سے بھرپور جواب دیا گیا تھا۔ ایرانی حکام نے خبردار کیا اگر اس دفعہ امریکہ نے کوئی حرکت کی تو جنگ صرف خطے تک ہی محدود نہیں رہے گی۔