واشنگٹن: امریکی صدر ڈونلڈ ٹرمپ نے ایران کے ساتھ جاری کشیدگی کے تناظر میں ایک بار پھر سخت لہجہ اختیار کرتے ہوئے سوشل میڈیا پر اپنی ایک متنازع تصویر شیئر کردی، جس میں وہ خودکار رائفل تھامے نظر آرہے ہیں جبکہ پس منظر میں پہاڑی علاقے میں دھماکے دکھائی دے رہے ہیں۔

ٹرمپ کی جانب سے شیئر کی گئی تصویر پر ’نو مور مسٹر نائس گائے‘ یعنی ’اب مزید نرم رویہ نہیں‘ کا پیغام درج ہے۔ رپورٹس کے مطابق تصویر مصنوعی ذہانت سے تیار کی گئی ہے، جس کے ذریعے امریکی صدر نے ایران کے معاملے پر اپنے سخت مؤقف کا اظہار کیا۔

ٹرمپ نے تصویر کے ساتھ ایران کو تنقید کا نشانہ بناتے ہوئے کہا کہ تہران غیر جوہری معاہدے پر اتفاق کرنے میں ناکام رہا ہے اور اسے جلد فیصلہ کرنا ہوگا۔ امریکی صدر نے ایران پر دباؤ برقرار رکھنے کا عندیہ دیتے ہوئے مزید سخت اقدامات کی طرف بھی اشارہ کیا۔

یہ پوسٹ ایسے وقت سامنے آئی ہے جب امریکا اور ایران کے درمیان جوہری پروگرام اور آبنائے ہرمز سمیت مختلف معاملات پر کشیدگی برقرار ہے۔ مذاکرات میں تعطل اور آبنائے ہرمز کی صورتحال نے خطے میں پہلے سے موجود تناؤ میں مزید اضافہ کردیا ہے۔

امریکی صدر اس سے قبل بھی ایران پر جوہری معاہدے کے لیے دباؤ بڑھانے اور تہران کو سخت نتائج سے خبردار کرتے رہے ہیں۔ نئی پوسٹ میں استعمال کی گئی تصویر اور ’اب مزید نرم رویہ نہیں‘ کے پیغام کو بھی ایران کے خلاف واشنگٹن کے سخت ہوتے مؤقف کے اظہار کے طور پر دیکھا جارہا ہے۔