واشنگٹن: امریکی صدر ڈونلڈ ٹرمپ نے دعویٰ کیا ہے کہ امریکا آبنائے ہرمز کو مکمل طور پر کنٹرول کر رہا ہے اور امریکی بحریہ نے اس اہم آبی گزرگاہ کو بارودی سرنگوں سے صاف کردیا ہے۔

غیر ملکی ذرائع ابلاغ کے مطابق اوول آفس میں صحافیوں سے گفتگو کرتے ہوئے ڈونلڈ ٹرمپ نے کہا کہ اس وقت آبنائے ہرمز کا کنٹرول صرف امریکی بحریہ کے پاس ہے۔ ان کے بقول امریکا کی جانب سے عائد ناکہ بندی ناقابل تسخیر رہی ہے اور یہ ایک فولادی دیوار کی مانند ہے، جبکہ صرف انہی لوگوں کو آبی گزرگاہ میں داخل ہونے کی اجازت دی جاتی ہے جنہیں امریکا اجازت دینا چاہتا ہے۔

امریکی صدر نے کہا کہ صورتحال کچھ پیچیدہ ضرور ہے کیونکہ ایران کبھی کبھار آبنائے ہرمز میں بارودی سرنگیں بچھا دیتا ہے، تاہم امریکی بحریہ ان سرنگوں کا سراغ لگانے کی صلاحیت رکھتی ہے۔ ان کے مطابق امریکی فوج نے پوری آبنائے ہرمز کو بارودی سرنگوں سے صاف کردیا ہے۔

ڈونلڈ ٹرمپ نے ایران کے ساتھ مذاکرات کے بعد امریکا کے آئندہ لائحہ عمل کے بارے میں تفصیلات بتانے سے گریز کیا۔ تاہم انہوں نے عندیہ دیا کہ امریکا ایران کے خلاف کارروائی مزید تیز کرسکتا ہے۔

امریکی صدر نے مزید کہا کہ امریکا ایران سے ان نقصانات کا ہرجانہ طلب کرنے جا رہا ہے جو ایرانی کارروائیوں کے نتیجے میں ہوئے ہیں۔ اس سے قبل بھی ٹرمپ نے امریکی بحری جہاز یو ایس ایس کول پر ہلاک ہونے والے افراد کے اہل خانہ کے لیے ایران سے ہرجانے کا مطالبہ کیا تھا۔

ٹرمپ کا کہنا تھا کہ امریکا ان تمام افراد کے لیے ایران سے ہرجانہ طلب کر رہا ہے جو مختلف تنازعات کے دوران ہلاک یا زخمی ہوئے ہیں۔ انہوں نے مذاکرات کے بعد امریکا کے اگلے اقدامات کے حوالے سے مزید تفصیلات فراہم کرنے سے ایک بار پھر انکار کردیا۔