واشنگٹن ڈی سی:امریکا کے صدر ڈونلڈ ٹرمپ نے دعویٰ کیا ہے کہ غزہ میں فلسطینی مزاحمتی تنظیم حماس کے غیر مسلح ہونے سے متعلق معاہدہ طے پا گیا ہے، جسے انہوں نے خطے میں امن کی جانب ایک اہم پیش رفت قرار دیا۔

غیر ملکی میڈیا رپورٹس کے مطابق صدر ٹرمپ نے کہا کہ جیسے ہی غزہ کو غیر مسلح کرنے کا عمل مکمل ہوگا، اسرائیلی افواج مرحلہ وار غزہ سے واپس چلی جائیں گی۔ ان کے بقول یہ معاہدہ غزہ میں نئی فلسطینی حکومت کے قیام کی جانب ایک اہم قدم ثابت ہوگا اور اس پر منظم اور مرحلہ وار طریقے سے عمل درآمد کیا جائے گا۔

ٹرمپ نے کہا کہ یہ پیش رفت ان کے 20 نکاتی غزہ امن منصوبے کا اہم حصہ ہے۔ منصوبے کے تحت غزہ میں حماس کے ہتھیار مرحلہ وار ختم کیے جائیں گے، جبکہ اسرائیل کو بھی وہ سیکیورٹی ضمانتیں فراہم کی جائیں گی جن کا وہ مطالبہ کرتا رہا ہے، تاکہ مستقبل میں غزہ کو حملوں کے اڈے کے طور پر استعمال نہ کیا جا سکے۔

امریکی میڈیا کے مطابق مجوزہ معاہدے سے غزہ میں ایک نئی فلسطینی ٹیکنوکریٹ حکومت کے قیام کی راہ بھی ہموار ہوگی، جو انتظامی امور سنبھالے گی۔

اپنے بیان میں صدر ٹرمپ نے کہا کہ ایک سال قبل غزہ شدید جنگ، انسانی بحران اور یرغمالیوں کے مسئلے سے دوچار تھا، تاہم اب صورتحال میں نمایاں پیش رفت ہوئی ہے، اگرچہ امن کے قیام کے لیے مزید اقدامات کی ضرورت ہے۔

انہوں نے مصر، قطر اور ترکیہ کے ثالثی کردار کو سراہتے ہوئے ان کا شکریہ ادا کیا اور مذاکراتی ٹیم کی کوششوں کو اس پیش رفت کا اہم سبب قرار دیا۔