واشنگٹن: امریکی صدر ڈونلڈ ٹرمپ نے چین پر 2020 کے امریکی صدارتی انتخابات کے دوران کروڑوں ووٹرز کا حساس ڈیٹا حاصل کرنے کا الزام عائد کرتے ہوئے اسے امریکی انتخابی تاریخ میں ڈیٹا کی سب سے بڑی مبینہ چوری قرار دیا ہے، تاہم چین نے ان الزامات کو بے بنیاد قرار دیتے ہوئے مکمل طور پر مسترد کر دیا۔

غیر ملکی میڈیا رپورٹس کے مطابق امریکی صدر ڈونلڈ ٹرمپ نے قوم سے خطاب میں دعویٰ کیا کہ چین نے 2020 کے صدارتی انتخابات کے دوران تقریباً 22 کروڑ امریکی ووٹرز کا ڈیٹا حاصل کیا، جس میں شہریوں کے نام، فون نمبرز، سیاسی وابستگی اور دیگر حساس معلومات شامل تھیں۔

صدر ٹرمپ کا کہنا تھا کہ اگر اس نوعیت کے ڈیٹا تک غیر مجاز رسائی حاصل کی گئی تو اسے ووٹر رجسٹریشن کے عمل میں مداخلت، انتخابی نظام پر اثرانداز ہونے یا دیگر غیر قانونی سرگرمیوں کے لیے استعمال کیا جا سکتا تھا۔ ان کے بقول یہ معاملہ امریکی انتخابی سلامتی کے لیے ایک سنگین خطرہ ہے، جس کی مکمل تحقیقات کی جائیں گی۔

انہوں نے کہا کہ اس معاملے سے متعلق بعض دستاویزات بھی منظرعام پر لائی جا رہی ہیں تاکہ حقائق عوام کے سامنے آسکیں۔ ٹرمپ نے ایک بار پھر مؤقف اختیار کیا کہ امریکی انتخابی نظام میں سیکیورٹی سے متعلق خامیاں موجود ہیں، جنہیں فوری طور پر دور کرنے کی ضرورت ہے تاکہ مستقبل میں ایسے خدشات سے بچا جا سکے۔

یہ پہلا موقع نہیں کہ امریکی صدر نے اس نوعیت کا دعویٰ کیا ہو۔ وہ رواں سال کے دوران مختلف مواقع پر بھی انتخابات کی سیکیورٹی اور غیر ملکی مداخلت سے متعلق خدشات کا اظہار کرتے رہے ہیں۔

دوسری جانب واشنگٹن میں قائم چینی سفارت خانے کے ترجمان نے امریکی صدر کے تمام الزامات کو مسترد کرتے ہوئے کہا کہ چین نے نہ کبھی امریکی صدارتی انتخابات میں مداخلت کی ہے اور نہ ہی مستقبل میں ایسا کرنے کا کوئی ارادہ رکھتا ہے۔

چینی ترجمان کا کہنا تھا کہ بیجنگ امریکی انتخابات میں مداخلت سے متعلق تمام الزامات کو بے بنیاد، غیر مصدقہ اور حقائق کے منافی سمجھتا ہے۔ انہوں نے زور دیا کہ چین ہمیشہ دوسرے ممالک کے داخلی معاملات میں عدم مداخلت کی پالیسی پر عمل کرتا ہے۔

امریکی صدر کے تازہ الزامات اور چین کی تردید کے بعد دونوں ممالک کے درمیان پہلے سے موجود کشیدہ تعلقات میں مزید تناؤ پیدا ہونے کا امکان ظاہر کیا جا رہا ہے، جبکہ اس معاملے پر مزید تحقیقات اور ممکنہ دستاویزات کے اجرا پر بھی عالمی توجہ مرکوز ہے۔