سوات کے علاقے کبل میں پولیس تھانے کے مرکزی دروازے کے قریب ہونے والے خودکش دھماکے میں پولیس اہلکاروں اور شہریوں سمیت 15 افراد جاں بحق جبکہ 18 افراد زخمی ہو گئے۔ دھماکے سے تھانے کی عمارت کو بھی جزوی نقصان پہنچا۔

پولیس کے مطابق دھماکے کے فوراً بعد امدادی کارروائیاں شروع کر دی گئیں اور جاں بحق افراد کی لاشوں اور زخمیوں کو سنٹرل ہسپتال سوات منتقل کر دیا گیا، جہاں متعدد زخمیوں کو طبی امداد فراہم کی جا رہی ہے۔

واقعے کے بعد پولیس اور دیگر قانون نافذ کرنے والے اداروں کی بھاری نفری ڈی پی او سوات محمد عمر خان کی قیادت میں جائے وقوعہ پر پہنچ گئی، علاقے کو گھیرے میں لے لیا گیا اور شواہد اکٹھے کرنے کا عمل شروع کر دیا گیا۔

ابتدائی تحقیقات کے مطابق حملہ خودکش تھا، جبکہ جائے وقوعہ سے حملہ آور کا سر بھی برآمد ہوا ہے۔ بم ڈسپوزل اسکواڈ دھماکے کی نوعیت اور استعمال ہونے والے بارودی مواد کا جائزہ لے رہا ہے، جبکہ ممکنہ سہولت کاروں کی گرفتاری کے لیے علاقے میں سرچ آپریشن جاری ہے۔

پولیس کا کہنا ہے کہ ابتدائی شواہد حملہ آور کے افغان شہری ہونے کی جانب اشارہ کرتے ہیں، تاہم اس حوالے سے حتمی تصدیق تحقیقات مکمل ہونے کے بعد ہی کی جائے گی۔

ڈی پی او سوات محمد عمر خان نے کہا کہ حملے میں ملوث عناصر اور ان کے سہولت کاروں کا سراغ لگا کر انہیں قانون کے کٹہرے میں لایا جائے گا، جبکہ واقعے کے ہر پہلو سے تحقیقات جاری ہیں۔

دوسری جانب وزیراعلیٰ خیبر پختونخوا سہیل آفریدی نے انسپکٹر جنرل پولیس سے واقعے کی رپورٹ طلب کر لی ہے۔ انہوں نے شہید پولیس اہلکاروں اور شہریوں کے اہل خانہ سے تعزیت کا اظہار کرتے ہوئے ہدایت کی کہ زخمیوں کو بہترین طبی سہولتیں فراہم کی جائیں۔ وزیراعلیٰ نے کہا کہ خیبر پختونخوا پولیس عوام کے جان و مال کے تحفظ کے لیے عظیم قربانیاں دے رہی ہے اور امن دشمن عناصر کو اپنے مذموم عزائم میں کامیاب نہیں ہونے دیا جائے گا۔