اسلام آباد:پاکستان کے قومی خلائی تحقیقی ادارے اسپیس اینڈ اپر ایٹموسفیئر ریسرچ کمیشن نے پاکستان کی پہلی چاند گاڑی کے نام کا اعلان کرنے کی تاریخ مقرر کردی ہے۔

سپارکو کے مطابق پاکستان کی پہلی چاند گاڑی کے نام کا اعلان 13 اگست کو کیا جائے گا۔ ادارے نے گزشتہ برس شہریوں سے چاند گاڑی کے لیے نام تجویز کرنے کی درخواست کی تھی، جس کے جواب میں تقریباً 4 ہزار تجاویز موصول ہوئیں۔

سپارکو حکام کے مطابق موصول ہونے والی تمام تجاویز میں سے ایک نام منتخب کیا گیا ہے، تاہم دلچسپ بات یہ ہے کہ یہی نام 9 مختلف افراد نے تجویز کیا تھا۔ منتخب نام تجویز کرنے والے افراد میں سے فاتح کا فیصلہ قرعہ اندازی کے ذریعے کیا جائے گا۔

فاتح کا اعلان سپارکو کے ہیڈ کوارٹرز میں منعقد ہونے والی تقریب کے دوران کیا جائے گا، جہاں قرعہ اندازی کے بعد کامیاب امیدوار کو نقد انعام بھی دیا جائے گا۔

پاکستان کی پہلی چاند گاڑی کو چین کے چانگ ای 8 مشن کے ذریعے چاند پر بھیجا جائے گا۔ یہ مشن 2028 میں لانگ مارچ فائیو راکٹ کے ذریعے خلا میں روانہ کیا جائے گا اور اس کے چاند کے جنوبی قطب کے قریب اترنے کا منصوبہ ہے۔

چانگ ای 8 مشن کے ساتھ پاکستان کی تیار کردہ چاند گاڑی بھی قمری سطح پر پہنچے گی۔ سپارکو کے مطابق اس چاند گاڑی کا وزن تقریباً 35 کلوگرام ہوگا۔

پاکستانی چاند گاڑی چاند کی سطح پر پہنچنے کے بعد مختلف سائنسی تجربات انجام دے گی اور قمری ماحول سے متعلق اہم معلومات جمع کرنے میں معاونت کرے گی۔

پاکستان کی جانب سے تیار کی جانے والی یہ چاند گاڑی ملک کے خلائی تحقیق کے پروگرام میں ایک اہم پیش رفت تصور کی جا رہی ہے۔ اس منصوبے کے ذریعے پاکستان کو قمری سطح پر سائنسی تحقیق اور تجربات میں براہ راست حصہ لینے کا موقع ملے گا۔