لاس اینجلس: فیفا ورلڈ کپ 2026 کے دوسرے کوارٹر فائنل میں اسپین نے دلچسپ اور سنسنی خیز مقابلے کے بعد بلجیم کو 2-1 سے شکست دے کر سیمی فائنل میں جگہ بنا لی، جہاں اس کا مقابلہ فرانس سے ہوگا۔

لاس اینجلس میں کھیلے گئے میچ میں اسپین نے ابتدا ہی سے جارحانہ کھیل پیش کیا۔ میچ کا پہلا گول اسپین کے فیبیان روئز نے 30ویں منٹ میں اسکور کیا، تاہم بلجیم کے چارلس ڈی کیٹیلارے نے 41ویں منٹ میں گول کرکے مقابلہ 1-1 سے برابر کردیا۔ یہ رواں ٹورنامنٹ میں اسپین کے خلاف ہونے والا پہلا گول بھی تھا۔

دوسرے ہاف میں دونوں ٹیموں کے درمیان سخت مقابلہ جاری رہا، لیکن میچ کے اختتامی لمحات میں اسپین کے میکل مرینو نے 88ویں منٹ میں فیصلہ کن گول اسکور کرکے اپنی ٹیم کو 2-1 کی برتری دلا دی، جو آخر تک برقرار رہی۔

اس کامیابی کے ساتھ اسپین ورلڈ کپ 2026 کے سیمی فائنل میں پہنچنے والی دوسری ٹیم بن گئی، جبکہ اس سے قبل فرانس بھی آخری چار ٹیموں میں جگہ بنا چکا ہے۔ اب سیمی فائنل میں اسپین اور فرانس کے درمیان کانٹے دار مقابلہ ہوگا۔

تاریخی اعتبار سے اسپین تیسری بار ورلڈ کپ کے سیمی فائنل میں پہنچا ہے۔ اس سے قبل وہ 1950 میں سیمی فائنل تک پہنچا تھا، جبکہ 2010 میں نہ صرف سیمی فائنل میں جگہ بنائی بلکہ پہلی مرتبہ عالمی چیمپئن بھی بنا۔

دوسری جانب بلجیم کی ٹیم ایک بار پھر سیمی فائنل تک رسائی حاصل کرنے میں ناکام رہی۔ اس سے قبل وہ 1986 اور 2018 کے ورلڈ کپ میں سیمی فائنل تک پہنچی تھی، تاہم دونوں مواقع پر فائنل تک رسائی حاصل نہ کر سکی۔