سیول:جنوبی کوریا کے صدر لی جے میونگ نے فٹبال ورلڈ کپ کے گروپ مرحلے سے قومی ٹیم کے اخراج پر شدید افسوس کا اظہار کرتے ہوئے ناکامی کی وجوہات جاننے کے لیے اعلیٰ سطح کی تحقیقات کا حکم دے دیا۔

صدر لی جے میونگ نے سوشل میڈیا پلیٹ فارم ایکس پر جاری بیان میں کہا کہ قومی ٹیم کی ورلڈ کپ میں شرکت پر ہونے والے تمام اخراجات عوام کے ٹیکس سے پورے کیے جاتے ہیں، اس لیے ٹیم کی ناکامی کے ہر پہلو کا غیر جانبدارانہ جائزہ لینا ضروری ہے۔

انہوں نے کہا کہ نسبتاً آسان گروپ میں شامل ہونے کے باوجود جنوبی کوریا کا اگلے مرحلے میں جگہ نہ بنا پانا ناقابل قبول ہے، جس پر انہیں شدید مایوسی اور حیرت ہوئی۔

صدر نے کورین فٹبال فیڈریشن کی انتظامیہ اور ہیڈ کوچ ہونگ میونگ بو کی تقرری کو بھی تنقید کا نشانہ بنایا۔ ان کا کہنا تھا کہ جب میرٹ اور صلاحیت کے بجائے ذاتی پسند و ناپسند کی بنیاد پر فیصلے کیے جائیں تو اس کے نتائج بھی ایسے ہی مایوس کن ہوتے ہیں۔

لی جے میونگ نے عوام سے ٹیم کی ناقص کارکردگی پر معذرت کرتے ہوئے یقین دلایا کہ حکومت کھیلوں کے انتظامی نظام میں اصلاحات کے لیے فوری اقدامات کرے گی تاکہ مستقبل میں ایسی صورتحال دوبارہ پیدا نہ ہو۔

انہوں نے وزارت کھیل کو ہدایت کی کہ ورلڈ کپ میں ٹیم کی ناکامی، فٹبال فیڈریشن کے اندرونی معاملات اور کوچ کی تقرری کے عمل کی مکمل تحقیقات کی جائیں اور ذمہ داروں کا تعین کیا جائے۔

واضح رہے کہ اسٹار فٹبالر سون ہونگ من کی موجودگی کے باوجود جنوبی کوریا کی ٹیم راؤنڈ آف 32 میں جگہ بنانے میں ناکام رہی، جسے مقامی میڈیا ملک کی تاریخ کی بدترین ورلڈ کپ کارکردگی قرار دے رہا ہے۔

جنوبی کوریا نے گروپ مرحلے میں اپنے پہلے میچ میں چیک ریپبلک کو 1-2 سے شکست دی، دوسرے میچ میں میزبان میکسیکو سے 0-1 سے ہارا، جبکہ تیسرے اور فیصلہ کن مقابلے میں جنوبی افریقہ کے ہاتھوں بھی 0-1 سے شکست کے بعد ایونٹ سے باہر ہوگیا۔