اسلام آباد:صومالیہ کے وزیر دفاع احمد معلم فقی نے ایک اعلیٰ سطح کے وفد کے ہمراہ پاکستان کے نیول اور ایئر ہیڈ کوارٹرز کا دورہ کیا، جہاں انہوں نے پاک بحریہ اور پاک فضائیہ کے سربراہان سے الگ الگ ملاقاتیں کرکے دوطرفہ دفاعی تعاون، علاقائی سلامتی اور پیشہ ورانہ اشتراک کے فروغ پر تفصیلی تبادلہ خیال کیا۔

پاک فوج کے شعبہ تعلقات عامہ (آئی ایس پی آر) کے مطابق صومالی وزیر دفاع نے بدھ کے روز نیول ہیڈ کوارٹرز میں پاک بحریہ کے سربراہ ایڈمرل نوید اشرف سے ملاقات کی۔ ملاقات میں باہمی پیشہ ورانہ دلچسپی کے امور، خطے کی بحری سلامتی کی صورتحال، سمندری تعاون اور دفاعی تعلقات کو مزید وسعت دینے کے مختلف پہلوؤں پر گفتگو کی گئی۔

آئی ایس پی آر کے مطابق نیول چیف ایڈمرل نوید اشرف نے اس موقع پر صومالیہ کے ساتھ دفاعی روابط کو مزید مضبوط بنانے کے لیے پاکستان کے عزم کا اعادہ کیا۔ انہوں نے کہا کہ دونوں ممالک کے درمیان دفاعی تعاون علاقائی امن اور بحری سلامتی کے فروغ میں اہم کردار ادا کر سکتا ہے۔

صومالی وزیر دفاع احمد معلم فقی نے علاقائی بحری سلامتی کے قیام اور سمندری خطرات سے نمٹنے میں پاک بحریہ کے کردار کو سراہتے ہوئے پاکستان کی پیشہ ورانہ صلاحیتوں کی تعریف کی۔

بعد ازاں صومالی وزیر دفاع نے ایئر ہیڈ کوارٹرز میں پاک فضائیہ کے سربراہ ایئر چیف مارشل ظہیر احمد بابر سدھو سے ملاقات کی۔ اس ملاقات میں دوطرفہ دفاعی تعاون، پیشہ ورانہ مہارت کے تبادلے، تربیتی پروگراموں اور استعدادِ کار میں اضافے سے متعلق امور پر تفصیلی بات چیت ہوئی۔

ایئر چیف مارشل ظہیر احمد بابر سدھو نے پاک فضائیہ کی مقامی سطح پر دفاعی صلاحیتوں کے فروغ، جدید تربیتی نظام، تحقیق و ترقی اور پیشہ ورانہ تبادلوں کے مختلف منصوبوں پر روشنی ڈالی۔ انہوں نے صومالی فضائیہ کے ساتھ ادارہ جاتی تعاون کو مزید مستحکم کرنے کے لیے پاکستان کے عزم کا بھی اعادہ کیا۔

آئی ایس پی آر کے مطابق صومالی وزیر دفاع نے پاک فضائیہ کی پیشہ ورانہ مہارت، جدید آپریشنل صلاحیتوں اور دفاعی شعبے میں حاصل کی گئی کامیابیوں کو سراہتے ہوئے دونوں ممالک کے درمیان دفاعی تعاون کو مزید وسعت دینے کی خواہش کا اظہار کیا۔