لاہور کے شیخ زاید ہسپتال نے طبی شعبے میں ایک اہم کامیابی حاصل کرتے ہوئے پنجاب کے سرکاری ہسپتالوں میں پہلی مرتبہ روبوٹک ٹیکنالوجی کے ذریعے گھٹنے کی تبدیلی (روبوٹک ٹوٹل نی آرتھروپلاسٹی) کی کامیاب سرجری انجام دے دی۔

میڈیا رپورٹس کے مطابق اس کامیاب آپریشن کے بعد شیخ زاید ہسپتال جدید روبوٹک آرتھوپیڈک سرجری کی سہولت فراہم کرنے والا پنجاب کا پہلا سرکاری ہسپتال بن گیا ہے، جہاں مریضوں کو عالمی معیار کی جدید طبی خدمات میسر آئیں گی۔

رپورٹس کے مطابق یہ پیچیدہ سرجری پروفیسر ڈاکٹر واصف علی شاہ نے RECH International کے تعاون سے انجام دی۔ جدید روبوٹک نظام کی مدد سے سرجری نہایت درستگی کے ساتھ مکمل کی گئی، جس سے مریض کو محفوظ اور مؤثر علاج فراہم کرنا ممکن ہوا۔

اس موقع پر ڈاکٹر محمد حاطف اقبال کا کہنا تھا کہ سرکاری شعبے میں جدید طبی ٹیکنالوجی کو فروغ دینا وقت کی اہم ضرورت ہے تاکہ عوام کو معیاری اور جدید علاج کی سہولت سرکاری سطح پر بھی دستیاب ہو سکے۔

انہوں نے کہا کہ چیئرپرسن پروفیسر ڈاکٹر عائشہ ہمایوں کی قیادت میں شیخ زاید ہسپتال صحت کے شعبے میں جدید سہولیات متعارف کرانے اور علاج کے معیار کو بہتر بنانے کے لیے مسلسل اقدامات کر رہا ہے۔

ماہرین کے مطابق روبوٹک ٹیکنالوجی سے گھٹنے کی تبدیلی کی سرجری روایتی طریقۂ کار کے مقابلے میں زیادہ درست اور محفوظ سمجھی جاتی ہے۔ اس جدید طریقے سے مصنوعی جوڑ کی تنصیب بہتر انداز میں ہوتی ہے، خون کا ضیاع نسبتاً کم ہوتا ہے اور مریض کے جلد صحت یاب ہونے کے امکانات بھی بڑھ جاتے ہیں۔

کامیاب آپریشن میں شعبہ آرتھوپیڈکس کے ساتھ اینستھیزیا، ریڈیالوجی اور آپریشن تھیٹر (او ٹی) کی ٹیموں نے بھی اہم کردار ادا کیا، جن کی مشترکہ کوششوں سے یہ اہم سنگ میل عبور کیا گیا۔

ماہرین کا کہنا ہے کہ شیخ زاید ہسپتال کی یہ پیش رفت نہ صرف سرکاری شعبے میں جدید آرتھوپیڈک سرجری کے فروغ کی علامت ہے بلکہ اس سے مستقبل میں مریضوں کو عالمی معیار کی جدید، محفوظ اور مؤثر طبی سہولیات کی فراہمی کی راہ بھی ہموار ہوگی۔