ڈھاکا: بنگلادیش نے واضح کیا ہے کہ سابق وزیراعظم شیخ حسینہ واجد کی حوالگی تک وزیراعظم طارق رحمان بھارت کا دورہ نہیں کریں گے۔ بنگلادیشی حکومت کا کہنا ہے کہ بھارت کی جانب سے شیخ حسینہ کی حوالگی کے معاملے پر پیش رفت دونوں ممالک کے درمیان سازگار ماحول پیدا کرنے کے لیے ضروری ہے۔

غیر ملکی خبررساں ایجنسی کے مطابق بنگلادیشی وزارت خارجہ کے عہدیدار اے کے ایم شاہد الکریم نے صحافیوں سے گفتگو کرتے ہوئے وزیراعظم طارق رحمان کے آئندہ ہفتے بھارت کے ممکنہ دورے سے متعلق قیاس آرائیوں کو مسترد کردیا۔

اے کے ایم شاہد الکریم نے کہا کہ بنگلادیش کا مؤقف ہے کہ وزیراعظم کے بھارت دورے سے قبل دونوں ممالک کے درمیان ایک سازگار ماحول قائم ہونا چاہیے۔ ان کے مطابق اس مقصد کے لیے بھارتی حکام پر زور دیا گیا ہے کہ وہ شیخ حسینہ اور دیگر مفرور ملزمان کی حوالگی کے معاملے میں اپنی کوششیں تیز کریں۔

شیخ حسینہ 2024 میں عوامی احتجاج اور سیاسی بحران کے بعد بنگلادیش چھوڑ کر بھارت چلی گئی تھیں۔ ان کے بھارت میں قیام کے بعد دونوں ممالک کے تعلقات میں کشیدگی میں اضافہ ہوا ہے۔

بنگلادیش میں شیخ حسینہ کو انسانیت کے خلاف جرائم کے مقدمے میں مجرم قرار دیے جانے کے بعد سزائے موت کا سامنا ہے۔ بنگلادیشی حکومت ان کی حوالگی کے لیے بھارت سے متعدد مرتبہ باضابطہ درخواست بھی کرچکی ہے۔

دوسری جانب بھارت کا کہنا ہے کہ بنگلادیش کی جانب سے شیخ حسینہ کی حوالگی کی درخواست کا متعلقہ قانونی طریقہ کار کے تحت جائزہ لیا جا رہا ہے اور معاملہ فی الحال زیرِ غور ہے۔

بنگلادیشی حکومت کا مؤقف ہے کہ شیخ حسینہ سمیت دیگر مفرور افراد کی حوالگی سے متعلق پیش رفت دونوں ممالک کے تعلقات میں اعتماد بحال کرنے اور مستقبل میں اعلیٰ سطح کے روابط کے لیے سازگار ماحول پیدا کرنے میں اہم کردار ادا کرسکتی ہے۔