ریاض:سعودی عرب کی قیادت میں قائم فوجی اتحاد نے حوثیوں کی جانب سے بحری ناکہ بندی کی دھمکیوں پر سخت ردِعمل دیتے ہوئے کہا ہے کہ ایسے کسی بھی اقدام کا بھرپور طاقت سے جواب دیا جائے گا۔اتحادی افواج کے ترجمان ترکی المالکی نے کہا کہ باب المندب میں بحری جہازوں کے تحفظ اور بین الاقوامی بحری راستوں کی سلامتی یقینی بنانے کے لیے سخت اقدامات جاری ہیں۔رپورٹس کے مطابق اتحادی افواج کے ترجمان نے مزید کہا کہ یمنی بندرگاہوں اور ہوائی اڈوں کی بندش سے متعلق دعوے گمراہ کن ہیں اور ان میں کوئی صداقت نہیں۔

دوسری جانب سعودی وزارتِ خارجہ نے یمن کی حوثی تنظیم انصار اللہ کی جانب سے مملکت کی بحری ناکہ بندی کے اعلان کی شدید مذمت کرتے ہوئے کہا ہے کہ سعودی عرب یمنی عوام اور یمن کی قانونی حکومت کی حمایت جاری رکھے گا۔

خیال رہے کہ اس سے قبل انصار اللہ کے ترجمان نے کہا تھا کہ یمن کی بندرگاہوں کی ناکہ بندی اور صنعا ایئرپورٹ پر حملوں کے جواب میں سعودی عرب کے خلاف اقدامات کیے جائیں گے۔جس پر قطر نے حوثیوں کی جانب سے سعودی عرب کی بحری ناکہ بندی کی دھمکی کی مذمت کرتے ہوئے اسے خطے کے امن و استحکام کے لیے تشویش ناک قرار دیا ہے۔

علاوہ ازاں امریکی صدر نے آج لبنانی صدر جوزف عون کے ہمراہ پریس کانفرنس کرتے ہوئے حوثی دھمکیوں پر سخت ردعمل دیتے ہوئے کہا تھا کہ اگر حوثیوں نے سعودی بندرگاہوں کو نشانہ بنانے یا بحیرہ احمر کو بندہ کرنے کی کوشش کی تو ان کے خلاف سخت اور فیصلہ کن کارروائی کی جائے گی اور امریکہ ایسا کرنے کی صلاحیت رکھتا ہے،ٹرمپ نے مزید کہا کہ امریکہ اس سے قبل بھی حوثیوں کے خلاف کارروائی کر چکا ہے۔