مظفرآباد: آزاد کشمیر کے انتخابات کے تیسرے مرحلے میں ضلع باغ کی نشست ایل اے 14 پر بڑا سیاسی اپ سیٹ سامنے آیا ہے، جہاں مسلم کانفرنس کے سربراہ سردار عتیق احمد خان اپنی آبائی نشست سے شکست کھا گئے۔

ضلع باغ اور حویلی کی چار نشستوں پر پیر کو ہونے والی پولنگ کے بعد ووٹوں کی گنتی جاری رہی، جبکہ مختلف حلقوں کے نتائج بھی سامنے آتے رہے۔ ایل اے 14 ضلع باغ کے تمام پولنگ اسٹیشنز کے غیر حتمی اور غیر سرکاری نتائج کے مطابق سردار عتیق احمد خان کو اپنی آبائی نشست پر شکست کا سامنا کرنا پڑا۔

غیر حتمی نتائج کے مطابق جموں و کشمیر دست و بازو پارٹی کے امیدوار سردار ساجد اقبال نے 40 ہزار 702 ووٹ حاصل کرکے کامیابی اپنے نام کی، جبکہ مسلم کانفرنس کے سربراہ سردار عتیق احمد خان 19 ہزار 542 ووٹ حاصل کرسکے۔

سردار ساجد اقبال نے سردار عتیق احمد خان کے مقابلے میں دگنے سے بھی زیادہ ووٹ حاصل کیے، جس کے باعث ان کی کامیابی کو انتخابات کا بڑا اپ سیٹ قرار دیا جا رہا ہے۔

سردار عتیق احمد خان کے لیے یہ شکست اس لیے بھی اہم ہے کہ ایل اے 14 ان کی آبائی نشست رہی ہے۔ ان کے والد سردار عبدالقیوم بھی ماضی میں اسی نشست سے کامیاب ہوتے رہے ہیں۔

انتخابی نتائج کے مطابق اس حلقے میں سردار ساجد اقبال کی کامیابی نے آزاد کشمیر کی سیاست میں ایک اہم سیاسی تبدیلی کی جانب اشارہ کیا ہے، تاہم حتمی نتائج اور سرکاری طور پر کامیابی کا اعلان متعلقہ انتخابی حکام کی جانب سے کیا جائے گا۔