جنوبی کوریا کی ٹیکنالوجی کمپنی سام سنگ نے امریکا میں اپنا نیا گلیکسی کریڈٹ کارڈ متعارف کرا دیا ہے، جس کے ذریعے صارفین مختلف اقسام کی خریداریوں پر کیش بیک اور دیگر خصوصی فوائد حاصل کر سکیں گے۔

غیر ملکی میڈیا رپورٹس کے مطابق سام سنگ نے اس کارڈ کی پیشکش کے لیے ویزا اور بارکلیز یو ایس کنزیومر بینک کے ساتھ شراکت داری کی ہے۔ گلیکسی کارڈ صارفین کو فزیکل میٹل کارڈ اور ورچوئل کارڈ، دونوں صورتوں میں دستیاب ہوگا۔

کمپنی کے مطابق کارڈ کے لیے درخواستیں 22 جولائی سے آن لائن اور امریکا بھر میں سام سنگ کے ریٹیل اسٹورز پر جمع کرائی جا سکیں گی۔ نئے صارفین اگر اکاؤنٹ کھولنے کے بعد ابتدائی 90 دنوں میں دو ہزار امریکی ڈالر خرچ کریں گے تو انہیں 200 ڈالر کا ویلکم بونس دیا جائے گا۔

گلیکسی کریڈٹ کارڈ کے ذریعے سام سنگ کی مصنوعات کی خریداری پر 5 فیصد، سام سنگ والیٹ کے ذریعے ادائیگی پر 3 فیصد، منتخب اسٹریمنگ سروسز پر 2 فیصد جبکہ دیگر اہل خریداریوں پر 1 فیصد کیش بیک فراہم کیا جائے گا۔

اس کے علاوہ کارڈ ہولڈرز کو سام سنگ وی آئی پی ایڈوانٹج ممبرشپ پر 20 فیصد رعایت اور ممبرشپ کی خریداری یا تجدید پر 5 فیصد اضافی کیش بیک بھی ملے گا۔

ماہرین کے مطابق سام سنگ نے یہ کریڈٹ کارڈ ایسے وقت میں متعارف کرایا ہے جب ایپل کو اپنا ایپل کارڈ لانچ کیے سات سال سے زائد عرصہ گزر چکا ہے۔ نئی پیش رفت سے توقع کی جا رہی ہے کہ دونوں ٹیکنالوجی کمپنیوں کے درمیان مالیاتی خدمات کے شعبے میں بھی مقابلہ مزید شدت اختیار کرے گا۔