ماسکو: روس نے خبردار کیا ہے کہ اگر یوکرین نے روسی سرزمین پر اہداف کو نشانہ بنانے کے لیے برطانیہ کے فراہم کردہ طویل فاصلے تک مار کرنے والے کروز میزائل استعمال کیے تو ماسکو برطانوی فوجی اہداف کو نشانہ بنا سکتا ہے۔

غیر ملکی خبر رساں ایجنسی کے مطابق روسی وزارتِ خارجہ کی ترجمان ماریہ زاخارووا نے ماسکو میں ایک پریس بریفنگ کے دوران برطانیہ کو سخت انتباہ جاری کیا۔ اسے یوکرین جنگ کے تناظر میں برطانیہ کے لیے روس کی جانب سے اب تک کی سخت ترین وارننگز میں شمار کیا جا رہا ہے۔

ماریہ زاخارووا نے کہا کہ برطانیہ روسی شہریوں کے خلاف ہونے والی اس کارروائی میں قانونی طور پر شریکِ جرم ہونے سے محض ’’ایک قدم کی دوری‘‘ پر ہے۔ انہوں نے خبردار کیا کہ اگر لندن نے اپنا موجودہ طرزِ عمل تبدیل نہ کیا تو اسے تباہ کن نتائج کا سامنا کرنا پڑ سکتا ہے۔

روسی ترجمان کے مطابق برطانیہ کی جانب سے یوکرین کو طویل فاصلے تک مار کرنے والے ہتھیاروں کی فراہمی اور ان کی تیاری کے لیے ٹیکنالوجی تک رسائی دینا ماسکو کے لیے شدید تشویش کا باعث ہے۔

واضح رہے کہ پیر کے روز برطانوی وزیراعظم اینڈی برنہم نے اعلان کیا تھا کہ برطانیہ یوکرین کو ایسی خفیہ ٹیکنالوجی تک رسائی فراہم کرے گا جس کی مدد سے کیف طویل فاصلے تک مار کرنے والے ’’اسٹارم شیڈو‘‘ کروز میزائل مقامی سطح پر تیار کرسکے گا۔

روس کی جانب سے تازہ انتباہ ایسے وقت میں سامنے آیا ہے جب مغربی ممالک کی جانب سے یوکرین کو جدید اور طویل فاصلے تک مار کرنے والے ہتھیاروں کی فراہمی کا معاملہ ماسکو اور مغربی ممالک کے درمیان کشیدگی کا اہم سبب بنا ہوا ہے۔