ماسکو:روسی صدر ولادیمیر پوتن نے روسی مسلح افواج کی افرادی قوت میں مزید 25 ہزار فوجی اہلکار شامل کرنے کی منظوری دے دی ہے، جس کے بعد فوج کی مجموعی نفری بڑھ کر 24 لاکھ 26 ہزار 130 ہو جائے گی۔ یہ فیصلہ ایک صدارتی فرمان کے ذریعے کیا گیا، جو یکم اگست سے نافذ العمل ہوگا۔

غیر ملکی میڈیا رپورٹس کے مطابق نئے صدارتی فرمان کے تحت روسی مسلح افواج میں مجموعی طور پر 27 ہزار افراد کا اضافہ کیا جائے گا، جن میں 25 ہزار فوجی اہلکار جبکہ باقی دیگر انتظامی اور معاون عملے پر مشتمل ہوں گے۔

فرمان کے مطابق روسی فوج میں فوجی اہلکاروں کی تعداد بڑھ کر 15 لاکھ 35 ہزار تک پہنچ جائے گی، جبکہ مجموعی نفری میں فوجی اور غیر فوجی دونوں طرح کا عملہ شامل ہوگا۔

کریملن کی جانب سے جاری کردہ تفصیلات میں بتایا گیا ہے کہ روسی وزارتِ دفاع کے مرکزی دفتر میں عملے کی زیادہ سے زیادہ تعداد 13 ہزار 400 مقرر کی گئی ہے۔ اس تعداد میں سکیورٹی گارڈز اور دیگر معاون عملہ شامل نہیں ہوگا، جبکہ وزارتِ دفاع کے مرکزی دفتر میں 4 ہزار 930 افراد سویلین سرکاری ملازمین کے طور پر اپنی خدمات انجام دیں گے۔

یہ فیصلہ ایسے وقت میں سامنے آیا ہے جب روس اور یوکرین کے درمیان جنگ کو چار سال مکمل ہونے کے قریب ہیں۔ مختلف بین الاقوامی میڈیا رپورٹس میں دعویٰ کیا جاتا رہا ہے کہ روس کو جنگ کے دوران فوجیوں کی کمی کا سامنا ہے، تاہم روسی حکام مسلسل ان دعوؤں کی تردید کرتے آئے ہیں۔

تجزیہ کاروں کے مطابق روسی فوج کی نفری میں حالیہ اضافہ اس بات کی عکاسی کرتا ہے کہ ماسکو اپنی عسکری صلاحیت کو مزید مضبوط بنانے اور طویل المدتی دفاعی ضروریات کو پورا کرنے کے لیے افرادی قوت میں اضافہ کر رہا ہے، اگرچہ اس فیصلے کی بنیادی وجوہات کے بارے میں روسی حکومت نے کوئی اضافی وضاحت نہیں کی۔