ماسکو: روس نے بحیرۂ اسود کے ساحلی تفریحی علاقے گیلینڈژک کے قریب ہونے والے مہلک ڈرون حملے کا الزام یوکرین پر عائد کرتے ہوئے کہا ہے کہ حملے میں کم از کم 7 افراد ہلاک جبکہ 40 سے زائد زخمی ہو گئے ہیں۔

غیر ملکی میڈیا رپورٹس کے مطابق حملہ ایک ایسے ساحلی مقام پر ہوا جہاں بڑی تعداد میں شہری موجود تھے۔ ابتدائی اطلاعات کے مطابق ڈرون کا اصل ہدف روس کا اہم بحری اڈہ نووروسیسک تھا، جو گیلینڈژک سے تقریباً 40 کلومیٹر دور واقع ہے، تاہم ڈرون اپنے ہدف تک پہنچنے کے بجائے ساحلی علاقے میں گر گیا، جس کے نتیجے میں متعدد شہری اس کی زد میں آ گئے۔

روسی علاقے کراسنوڈار کرائی کے گورنر وینیامین کوندراتیف نے اپنے ٹیلی گرام بیان میں بتایا کہ ہلاکتوں کی تعداد بڑھ کر 7 ہو گئی ہے، جن میں تین بچے بھی شامل ہیں۔ ان کے مطابق حملے میں زخمی ہونے والے افراد کو فوری طور پر قریبی اسپتالوں میں منتقل کیا گیا، جہاں متعدد زخمیوں کی حالت تشویشناک بتائی جا رہی ہے۔

گورنر نے مزید کہا کہ متاثرہ علاقے میں امدادی کارروائیاں جاری ہیں جبکہ سیکیورٹی اداروں نے علاقے کو گھیرے میں لے کر تحقیقات کا آغاز کر دیا ہے۔ روسی حکام کا کہنا ہے کہ واقعے کی مکمل تحقیقات کے بعد مزید تفصیلات سامنے لائی جائیں گی۔

دوسری جانب یوکرین کی جانب سے اس حملے پر فوری طور پر کوئی باضابطہ ردعمل سامنے نہیں آیا۔

واضح رہے کہ روس اور یوکرین کے درمیان جنگ مسلسل جاری ہے اور دونوں ممالک ایک دوسرے کے علاقوں میں ڈرون اور میزائل حملے کر رہے ہیں۔ حالیہ مہینوں میں روس کے اندر یوکرینی ڈرون حملوں کی تعداد میں نمایاں اضافہ دیکھا گیا ہے، جن کا ہدف عموماً فوجی تنصیبات، توانائی کے مراکز اور عسکری انفراسٹرکچر کو قرار دیا جاتا ہے۔

ماہرین کا کہنا ہے کہ جنگ میں ڈرونز کے بڑھتے ہوئے استعمال نے محاذ جنگ سے دور شہری علاقوں کو بھی خطرات سے دوچار کر دیا ہے، جس کے باعث دونوں ممالک میں سیکیورٹی خدشات میں مزید اضافہ ہو رہا ہے۔