ویب ڈیسک:غیر ملکی میڈیا رپورٹس کے مطابق یورپی انٹیلی جنس کی ایک رپورٹ میں 2026 کے دوران روس کو بڑے اور سنگین بینکاری بحران کا سامنا ہونے کا خدشہ ظاہر کیا گیا ہے۔

رپورٹ کے مطابق روس کی جنگی معیشت کا مالی بوجھ بڑی حد تک ملکی بینکوں پر منتقل ہو چکا ہے، جس کے باعث بینکاری نظام پر دباؤ میں نمایاں اضافہ ہوا ہے۔

رپورٹ میں کہا گیا ہے کہ دفاعی شعبے، رہائشی قرضوں اور سرکاری منصوبوں کے لیے رعایتی قرضوں کی فراہمی نے بینکوں کے مالیاتی خطرات میں اضافہ کر دیا ہے۔ اس کے علاوہ گھریلو قرضوں اور دیوالیہ پن کے بڑھتے رجحان نے بھی روسی معیشت کو مزید کمزور کیا ہے۔

رپورٹ کے مطابق کارپوریٹ قرضوں کا تقریباً 10 فیصد حصہ مشکوک قرار دیا جا رہا ہے، جبکہ بعض بڑے بینکوں میں قرضوں پر شرح سود 15 فیصد تک پہنچ چکی ہے۔ مزید یہ کہ 2026 کے دوران تقریباً پانچ لاکھ روسیوں نے دیوالیہ پن کا اعلان کیا۔

رپورٹ میں کہا گیا کہ روسی حکومت کی مالی معاونت، قرضوں کی ازسرنو ترتیب اور سرکاری ضمانت والے پروگرام وقتی طور پر بینکوں کو سہارا دے رہے ہیں، تاہم یہ اقدامات بنیادی مالی مشکلات کا مستقل حل نہیں ہیں۔

دوسری جانب رپورٹ میں یہ بھی کہا گیا ہے کہ اگرچہ یورپی یونین روس پر مزید پابندیوں کی تیاری کر رہی ہے، تاہم بعض ماہرین کے مطابق دفاعی اخراجات، ریاستی کنٹرول اور ایشیائی ممالک کے ساتھ تجارتی روابط روسی معیشت کو مکمل بحران سے بچا سکتے ہیں۔

ادھر روسی مرکزی بینک نے رپورٹ میں ظاہر کیے گئے خدشات کو مسترد کرتے ہوئے کہا ہے کہ ملکی بینکوں کا سرمایہ مضبوط ہے اور مالیاتی شعبے کی صورتحال اتنی تشویشناک نہیں جتنی رپورٹ میں بیان کی گئی ہے۔