ریاض: سعودی عرب کے دارالحکومت ریاض میں پاکستانی سفارت خانے کے زیر اہتمام مینگو فیسٹیول کا انعقاد کیا گیا، جہاں پاکستانی آموں کی مختلف اقسام کو خوبصورت انداز میں پیش کیا گیا اور سعودی شہریوں سمیت غیر ملکی مہمانوں نے ان کے منفرد ذائقے کو خوب سراہا۔

تفصیلات کے مطابق فیسٹیول کا انعقاد ایک مقامی شاپنگ مال میں کیا گیا، جس کا افتتاح پاکستان کے سفیر احمد فاروق نے کیا۔ تقریب میں پاکستانی اور سعودی شہریوں کے علاوہ مختلف ممالک سے تعلق رکھنے والے افراد نے بھی شرکت کی۔

فیسٹیول میں پاکستان کے مشہور آم، جن میں چونسہ، انور رٹول، سندھڑی، لنگڑا، دسہری اور دیگر اقسام شامل تھیں، نمائش کے لیے پیش کیے گئے۔ شرکاء نے پاکستانی آموں کے ذائقے اور معیار کو بے حد پسند کیا۔

اس موقع پر پاکستان کے سفیر احمد فاروق نے کہا کہ سعودی عرب پاکستانی آموں کی ایک اہم منڈی ہے، جہاں نہ صرف سعودی شہری بلکہ مختلف ممالک سے تعلق رکھنے والے افراد بھی پاکستانی آموں کو بے حد پسند کرتے ہیں۔

فیسٹیول میں شریک پاکستانیوں کا کہنا تھا کہ اس وقت سعودی عرب کی مختلف مارکیٹوں میں پاکستانی آموں کی خوشبو اور مانگ نمایاں ہے۔ ان کے مطابق اس نوعیت کی تقریبات نہ صرف پاکستانی آموں کی عالمی سطح پر تشہیر کا ذریعہ بنتی ہیں بلکہ برآمدات میں اضافے اور ملکی معیشت کو مضبوط بنانے میں بھی اہم کردار ادا کرتی ہیں۔