کوئٹہ: بلوچستان کے دارالحکومت کوئٹہ کے نواحی علاقے اسپین کاریز میں کوئلے کی کان میں گیس دھماکے کے بعد کان بیٹھ گئی، جس کے نتیجے میں کم از کم 18 کان کن جاں بحق ہوگئے، جبکہ 3 مزدوروں کو زندہ نکال لیا گیا۔ کان کے اندر پھنسے دیگر مزدوروں کی تلاش کے لیے ریسکیو آپریشن تاحال جاری ہے۔

ابتدائی اطلاعات کے مطابق حادثے کے وقت کان میں درجنوں مزدور موجود تھے۔ دھماکے کے باعث کان کا بڑا حصہ منہدم ہوگیا اور متعدد کان کن ملبے تلے دب گئے۔ امدادی ٹیمیں بھاری مشینری کی مدد سے ملبہ ہٹا کر پھنسے ہوئے مزدوروں تک پہنچنے کی کوشش کر رہی ہیں۔

صوبائی وزیر معدنیات میر شعیب نوشیروانی نے بتایا کہ وزیراعلیٰ بلوچستان میر سرفراز بگٹی کی ہدایت پر چیف انسپکٹر آف مائنز، پی ڈی ایم اے اور دیگر متعلقہ اداروں نے فوری طور پر امدادی کارروائیاں شروع کر دیں۔ انہوں نے کہا کہ حکومت ریسکیو آپریشن کی مسلسل نگرانی کر رہی ہے اور تمام دستیاب وسائل بروئے کار لائے جا رہے ہیں۔

انہوں نے مزید بتایا کہ جاں بحق کان کنوں کے ورثا کو 5 لاکھ روپے جبکہ زخمی مزدوروں کو 3 لاکھ روپے مالی امداد فراہم کی جائے گی۔