لاہور:پنجاب حکومت نے صوبے میں بلدیاتی انتخابات کے انعقاد کے لیے 12 ارب 52 کروڑ 24 لاکھ روپے کے فنڈز کی منظوری دے دی ہے۔ اس حوالے سے فیصلہ وزیراعلیٰ پنجاب مریم نواز کی زیر صدارت ہونے والے صوبائی کابینہ کے 36ویں اجلاس میں کیا گیا۔

تفصیلات کے مطابق اجلاس میں محکمہ بلدیات کی جانب سے بلدیاتی انتخابات کے انعقاد کے لیے طلب کیے گئے فنڈز کی منظوری دی گئی۔ صوبائی کابینہ نے یہ بھی فیصلہ کیا کہ مذکورہ رقم وفاقی حکومت سے حاصل کی جائے گی، جس کے لیے پنجاب حکومت جلد وفاق کو باضابطہ مراسلہ ارسال کرے گی تاکہ الیکشن کمیشن کو انتخابات کے انعقاد کے لیے درکار وسائل فراہم کیے جا سکیں۔

ذرائع کے مطابق آئینی ترمیم کے بعد بلدیاتی انتخابات سمیت قومی اسمبلی، صوبائی اسمبلیوں اور سینیٹ کے انتخابات کے اخراجات وفاقی حکومت برداشت کر سکتی ہے۔ آئین کے آرٹیکل 81 میں کی گئی ترمیم کے تحت انتخابی اخراجات کو وفاقی کنسولیڈیٹڈ فنڈ پر چارجڈ اخراجات میں شامل کر دیا گیا ہے، جس کے باعث ان فنڈز کو آئینی تحفظ بھی حاصل ہے۔

ذرائع کا کہنا ہے کہ الیکشن کمیشن انتخابی اخراجات کے لیے براہ راست وفاقی حکومت سے بھی فنڈز طلب کر سکتا ہے اور ان رقوم کے لیے ہر سال عام بجٹ سے الگ منظوری لینا ضروری نہیں ہوتی۔

رپورٹس کے مطابق پنجاب حکومت نے رواں مالی سال کے دوران 540 ارب روپے وفاقی حکومت کو سرینڈر کیے تھے، جبکہ محکمہ بلدیات نے بلدیاتی انتخابات کے انعقاد کے لیے 12 ارب روپے سے زائد فنڈز کی درخواست دی تھی، جسے صوبائی کابینہ نے منظور کر لیا۔

حکومت کے اس فیصلے کو پنجاب میں بلدیاتی انتخابات کے انعقاد کی جانب ایک اہم پیش رفت قرار دیا جا رہا ہے۔ فنڈز کی فراہمی کے بعد انتخابی انتظامات اور شیڈول سے متعلق معاملات میں بھی پیش رفت متوقع ہے، جبکہ الیکشن کمیشن آئندہ مراحل کے حوالے سے فیصلہ کرے گا۔