اسلام آباد: پاکستان ٹیلی کمیونیکیشن اتھارٹی (پی ٹی اے) نے موبائل فون صارفین کو خبردار کیا ہے کہ اگر ان کا قومی شناختی کارڈ (سی این آئی سی) غیر فعال یا زائد المعیاد ہو گیا ہے تو اس کے ساتھ رجسٹرڈ موبائل سمز کسی بھی وقت معطل کی جا سکتی ہیں۔

پی ٹی اے کی جانب سے جاری بیان میں کہا گیا ہے کہ موبائل سروس بلا تعطل جاری رکھنے کے لیے صارفین اپنے قومی شناختی کارڈ کی معیاد پر نظر رکھیں اور بروقت اس کی تجدید کروائیں۔ بصورت دیگر غیر فعال شناختی کارڈ سے منسلک سمز بند ہونے کا سامنا کرنا پڑ سکتا ہے۔

اتھارٹی نے شہریوں کو ہدایت کی ہے کہ وہ اپنے شناختی کارڈ کی معلومات بروقت اپ ڈیٹ کروائیں۔ اگر کسی کا شناختی کارڈ غیر فعال ہو چکا ہے تو پہلے اسے نادرا سے دوبارہ فعال کرائیں تاکہ موبائل سروس متاثر نہ ہو۔

پی ٹی اے کے مطابق صارفین اپنے متعلقہ موبائل آپریٹر کے سروس سینٹر سے رجوع کریں، بائیو میٹرک تصدیق مکمل کریں اور اپنی سم رجسٹریشن کی موجودہ حیثیت بھی چیک کریں، خصوصاً اگر ان کا شناختی کارڈ غیر فعال ہے۔

پی ٹی اے نے اپنی سوشل میڈیا پوسٹ میں بھی واضح کیا ہے کہ شناختی دستاویزات کی بروقت تجدید اور درست معلومات کی فراہمی سے موبائل کنیکٹیویٹی برقرار رہے گی اور صارفین کسی بھی ممکنہ معطلی سے محفوظ رہ سکیں گے۔