اسلام آباد: پاکستان ٹیلی کمیونیکیشن اتھارٹی (پی ٹی اے) اور میٹا نے نوجوانوں اور بچوں کے لیے محفوظ ڈیجیٹل ماحول کے فروغ اور آن لائن تحفظ کو بہتر بنانے کے مقصد سے ایک لیٹر آف انٹینٹ (Letter of Intent) پر دستخط کر دیے ہیں۔

معاہدے کے تحت دونوں ادارے پاکستان میں محفوظ آن لائن پلیٹ فارمز کے فروغ، ڈیجیٹل مواد کے تحفظ اور صارفین کی سلامتی سے متعلق مختلف شعبوں میں باہمی تعاون کو وسعت دیں گے۔ اس شراکت داری کا مقصد انٹرنیٹ استعمال کرنے والوں، خصوصاً نوجوانوں اور بچوں، کے لیے زیادہ محفوظ اور ذمہ دار ڈیجیٹل ماحول فراہم کرنا ہے۔

پی ٹی اے اور میٹا نوجوانوں میں ذمہ دارانہ ڈیجیٹل رویوں کے فروغ، آن لائن تحفظ سے متعلق آگاہی مہمات، پالیسی سازی پر مکالمے اور متعلقہ اداروں کی استعداد کار بڑھانے کے لیے مشترکہ اقدامات کریں گے۔

اس تعاون کے تحت دونوں ادارے بین الاقوامی سطح پر اپنائے جانے والے بہترین طریقہ کار سے بھی استفادہ کریں گے اور آن لائن خطرات سے نمٹنے کے لیے مؤثر حکمت عملی مرتب کرنے میں ایک دوسرے کے ساتھ مل کر کام کریں گے۔

اس موقع پر چیئرمین پی ٹی اے حفیظ الرحمٰن نے کہا کہ ادارے کا بنیادی ہدف صارفین کے لیے ایک محفوظ، قابل اعتماد اور ذمہ دار ڈیجیٹل ماحول کی فراہمی ہے۔ ان کے مطابق میٹا کے ساتھ یہ اشتراک بچوں اور نوجوانوں میں محفوظ انٹرنیٹ کے استعمال، ڈیجیٹل آگاہی کے فروغ اور آن لائن تحفظ کے نظام کو مزید مؤثر بنانے میں اہم کردار ادا کرے گا۔

انہوں نے اس عزم کا بھی اظہار کیا کہ پی ٹی اے اور میٹا مشترکہ کوششوں کے ذریعے پاکستان میں ڈیجیٹل تحفظ کے معیار کو مزید بہتر بنانے اور صارفین کو ایک محفوظ آن لائن ماحول فراہم کرنے کے لیے تعاون جاری رکھیں گے۔