امریکی صدر ڈونلڈ ٹرمپ نے اعلان کیا ہے کہ ایران کے ساتھ مذاکرات آج دوپہر سے شروع ہوں گے اور دونوں ممالک کے درمیان رابطے ایک متفقہ مذاکراتی فریم ورک کے تحت جاری ہیں۔

تفصیلات کے مطابق ایئر فورس ون میں صحافیوں سے گفتگو کرتے ہوئے صدر ٹرمپ نے کہا کہ آبنائے ہرمز کے حوالے سے ایک معاہدہ پہلے سے موجود ہے، جبکہ انہیں امید ہے کہ ایران کے ایٹمی ہتھیاروں کے خاتمے سے متعلق بھی معاہدہ طے پا جائے گا۔

انہوں نے کہا کہ ایران پر ایک بڑے فوجی حملے کا منصوبہ سعودی عرب، متحدہ عرب امارات، قطر اور ایران کی درخواست پر منسوخ کیا گیا۔ ان کے بقول خطے کے ممالک کی اپیل پر فوجی کارروائی روکنے کا فیصلہ کیا گیا۔

ڈونلڈ ٹرمپ نے مزید کہا کہ اگر ایران پر حملہ کیا جاتا تو یہ دوسری جنگ عظیم کے بعد سب سے بڑا حملہ ہوتا، تاہم وہ لوگوں کو مارنا نہیں چاہتے اور ان کی اولین ترجیح معاہدے کے ذریعے مسئلے کا حل نکالنا ہے۔

امریکی صدر کا کہنا تھا کہ مشرقِ وسطیٰ میں امریکا کے متعدد اتحادی بھی فوجی کارروائی کے بجائے سفارتی حل کے حامی ہیں۔ انہوں نے ایک بار پھر زور دیا کہ معاہدہ ہی آگے بڑھنے کا بہترین راستہ ہے، تاہم اگر مذاکرات ناکام ہوئے تو خطے میں کشیدگی اور تنازع مزید بڑھ سکتا ہے۔

واضح رہے کہ اس سے قبل ڈونلڈ ٹرمپ نے ایران کو سخت حملوں کی دھمکی دیتے ہوئے تیل کی تنصیبات اور دیگر سویلین انفرااسٹرکچر کو نشانہ بنانے کا عندیہ دیا تھا، جس کے جواب میں ایران نے بھی خلیجی ممالک کی آئل تنصیبات اور دیگر اہم انفرااسٹرکچر کو نشانہ بنانے کی دھمکی دی تھی۔