تہران:ایران کے سپریم لیڈر کے مشیر علی اکبر ولایتی نے بیروت میں حالیہ اسرائیلی حملے کے بعد سخت ردعمل دیتے ہوئے کہا ہے کہ اب صبر کی گنجائش باقی نہیں رہی اور صورتحال ایک نئے مرحلے میں داخل ہو چکی ہے۔

سماجی رابطے کی ویب سائٹ ایکس پر جاری اپنے بیان میں علی اکبر ولایتی نے کہا کہ بیروت میں کی گئی کارروائی ایک سنگین غلط اندازے کا نتیجہ ہے جس نے حالات کو مزید کشیدہ بنا دیا ہے۔ ان کا کہنا تھا کہ صبر کا دامن اب چھوٹ چکا ہے اور تمام ضروری اقدامات کے لیے تیاری مکمل ہے۔

انہوں نے کہا کہ لبنان خطے میں مزاحمتی اتحاد کا ایک اہم ستون ہے اور اس کے خلاف کسی بھی اقدام کو پورے مزاحمتی محور کے خلاف کارروائی تصور کیا جائے گا۔

ولایتی نے خبردار کیا کہ اگر لبنان میں جاری کشیدگی کو قابو میں نہ لایا گیا تو اس کے اثرات خطے کے اہم بحری راستوں تک پھیل سکتے ہیں۔ ان کے مطابق آبنائے ہرمز اور باب المندب جیسے عالمی تجارتی اور توانائی کی ترسیل کے اہم راستے بھی خطرات سے دوچار ہو سکتے ہیں۔

سیاسی مبصرین کا کہنا ہے کہ ولایتی کا بیان خطے میں بڑھتی ہوئی کشیدگی کے تناظر میں ایک سخت پیغام کے طور پر دیکھا جا رہا ہے، جس میں بالواسطہ طور پر اہم بحری گزرگاہوں پر ممکنہ دباؤ کا اشارہ دیا گیا ہے۔ تاہم ایرانی رہنما کے مشیر نے کسی فوری عسکری کارروائی یا عملی اقدام کی تفصیلات فراہم نہیں کیں۔